Barra lateral
Calendário de Eventos
Novembro 24, 2017
S M T W T F S
1 2 3 4
5 6 7 8 9 10 11
12 13 14 15 16 17 18
19 20 21 22 23 24 25
26 27 28 29 30
Acesso de Beneficiário
Inicio Ministériu Enquadramentu Ministra

Enquadramentu Ministra

Uluk nana’in ha’u hato’o parabens no apresiasaun ba estabelesimentu website Ministériu Solidariedade Sosiál (MSS), ne’ebé prepara ona hosi Diresaun Jerál Korporativus, liu hosi Unidade Komunikasaun Sosiál   no Unidadae Teknolojia Informasaun. Ho website ne’ebé iha, VII Governu Konstitusionál, liu-liu Ministériu Solidariedade Sosiál, bele iha kanál importante ida ne’e, hodi abranje informasaun ho di’ak liu tan kona-ba servisus no atividades ministériu nian ba lee na’in sira.

Hanesan ita hotu hatene, MSS la’ós Ministériu ida ba dala uluk ne’ebé halo knaar iha área sosiál nian, maibé área ida ne’e hahú kedas ona iha tempu Governu UNTAET (United Nation Transitional in East Timor), ne’ebé Xefia hosi Dr. Sergio Vieira de Mello iha tinan 2000.

Iha tempu Guvernu Tranzisaun, servisu iha área sosiál hala’o liu hosi Gabinete ida, ne’ebé hanaran Cabinet of Social Affairs, ho nia prioridade servisu mak hanesan Asuntu Saúde, Edukasaun, nomós Traballu Sosiál.

Iha Segundu Governu, ne’ebé Lidera hosi Dr. Mari’i Alkatiri (Ministro em Chefe), servisu área sosiais diriji hosi Sekretáriu Estadu ida, ne’ebé hanaran Secretário do Estado Trabalho e Solidariedade (SETS), ne’ebé ikus, iha Fulan Jullu 2005, SETS transforma fali hanesan Ministériu ida, ho naran Ministério Trabalho Reinsserção Comunitária (MTRC). Mudansa ida ne’e bazeia ba Decreto Lei no. 2/2005 kona-bá remodelasaun estrutura orgániku.

Nune’e mós iha IV Guvernu Konstitusional, sei nafatin kontinua fó importánsia ba fortifika servisu iha área sosiais nian, ne’ebé haforsa liu hosi Dekretu Lei no. 7/2007, 5 de Setembru, kona-bá Orgánika Konstitusionál, ne’ebé deklara iha artigu 27, kona-bá estabelesimentu Ministériu Solidariedade Sosiál.

Iha V Governu Konstitusionál, liu hosi Dekretu Lei no 47/2012, 5 Dezembru, aprova Lei Orgánika foun MSS nian, hodi nafatin sai nu’udar “órgaun sentrál Governu nian ne’ebé responsabiliza ba konsepsaun, ezekusaun, koordenasaun no avaliasaun ba polítika ne’ebé define no aprova ona husi Konsellu Ministru ba iha área seguransa sosiál, asisténsia sosiál, dezastre naturál  no reinsersaun komunitária.

Hafoin liu tiha tinan rua ho balun, akontese-tan mudansa ba estrutura Governu nian hodi hamosu VI Governu Konstitusionál ne’ebé lidera hosi Dr. Rui Maria de Araújo. Mudansa refere hala’o mós ba iha MSS, liu hosi Dekretu Lei N.o 33/2015, 26 Agostu.

Tinan rua ho balun VI Governu hakotu nia mandatu, ikus iha tinan 2017, demokrátikamente hamosu VII Governu Konstitusionál, ne’ebé lidera hosi Primeiru Ministru Sua. Excia. Dr. Marii Alkatiri.

 

Maluk Lee Na’in Sira,
Objetivu kria website ida ne’e, atu fasilita lee na’in sira hodi bele akompaña servisu MSS no kontribui fó ideias ba prosesu no rezultadu servisu tomak, nomós atu habelar informasaun kona-bá formulasaun planeamentu servisu ne’ebé MSS iha, liu-liu planu hodi atinji vizaun no misaun iha futuru. 

Esperansa boot, katak ba oin website ida ne’e bele aprezenta informasaun no dadus ne’ebé di’ak, kompletu no komprensivu liu kona-bá servisu MSS nian, ne’ebé fó ona mandatu ba Diresoins Nasionais 10, Diresoins Munisipais 12, hamutuk ho Departamentus 25 hodi hala’o, liu-liu iha áreas ne’ebé sai ona prioridades MSS. Liu hosi website ida ne’e mós, buat ida ne’ebé ita sei hetan iha futuru mak, sei hamosu no hasa’e konfiansa hosi kada nivel komunidade, liu-liu parseiru sira ba iha Governu ida ne’e.

Konteudu hosi website ida ne’e, jeralmente sei ko’alia kona-bá vizaun & misaun, estrutura, baze legál, polítika, planus, notísias atividades no relatórius servisu, ne’ebé durante ne’e MSS realiza tiha ona no ne’ebe sei trasa hela.

Atu hasa’e liu-tan kualidade dadus no informasaun iha website ida ne’e, MSS presiza tebes krítika, sujestaun no solusaun hodi dezenvolve web ida ne’e ho di’ak, no bele sai sentru informasaun ba sira ne’ebé presiza. Ho ida ne’e, ami hein ita boot sira nia kontribuisaun no partisipasaun.



Dra. Florentina da Conceição Pereira Martins Smith
Ministra Solidariedade Sosiál