MINISTRA MSS INAUGURA EDIFÍSIU CSSM MANU-FAHI

Dep. Media 05 May, 2017 


Iha tinan 2017, hafoin Ministériu Solidariedade Sosiál inaugura Centru Solidariedade Sosiál Munisípiu Lospalos no Liquiça, Ministériu, liu hosi Ministra Solidariedade Sosiál, Dra. Isabel Amaral Guterres inaugura tan edifísiu Centru Solidariedade Sosiál Munisípiu Manu-Fahi ne’ebé uluk hanesan Sentru Rejionál hodi fasilita funsionáriu sira atu hala’o servisu atendimentu sosiais ba komunidade sira iha futuru. Edifísiu refere hetan bensaun hosi Amu Pároquia Domingos Bian ne’ebé hala’o iha Same-Hola Rua, Loron Sexta-Feira, (05/05/2017).

Iha oportunidade ne’e, Ministra Solidariedade Sosiál, Dra, Isabel Amaral Guterres hateten, planu edifísiu foun ne’ebé ohin ita inaugura, ne’e mai hosi IV Governu Konstituisionál i ita tenke iha edifísiu ida ne’e, para bele fasilita no ajuda di’ak liu tan ita nia servisu, liu-liu atu haree ita nia maluk sira ne’ebé persiza ita nia atendimentu iha área sosias no protesaun nian.

Dehan Ministra, Ita komesa deskonsentra ona servisu sosiais balun ba besik komunidade sira, balun ne’ebé seidauk deskonsentra, tanba depende ba púlitika ne’ebé ita iha, liu-liu ita sei la deskonsentra kona-ba servisu Veteranus nian, Seguransa sosiál, Bolsa da Mãe, Idosos no Inválides, maibe dezastre naturais, Carru Vunerariu ita komesa deskonsentra no ba oin munisípiuu sira la’o di’ak ona ita sei deskonsentra tan servisu sosiais nian ba munisípiu hotu, maibe importante liu mak ita tenke hadia liu tan atendimentu servisus sosias ne’ebé di’ak liu tan ba ita nia komunidade sira.

Orsamentu konstrusaun edifísiu CSSM Manu-Fahi ho total $ 419,833.88 mil Dolares Amerikanu ne’ebé mak selu ba kompañia Bensa au Ama hamutuk $.303,625.48 mil, ba kompaña My Frend Lda ne’ebé hatutan servisu hosi kompañia refere hodi finaliza edifísiu ida ne’e hamutuk $ 106, 208.40 mil no orsamentu ba seremónia inaugurasaun hamutuk $.2.500 ne’ebé apoiu hosi Ministériu rasik.

Nune’e mós, Diretór CSSM Manu-Fahi, Jose Tilman hato'o nia sentimentu kontente, tanba loron ida ohin hanesan oportunidade ida ne’ebé mak importante, tanba bele iha ona edifísiu ba sira CSSM Manu-Fahi, edifísiu ida ne’e bele hamrik, tanba ita hotu nia esforsu no apoiu mak bele realiza hodi edifísiu foun ida ne’e bele inaugura ohin loron.

"Ami mós haksolok tebes, tanba hosi ejisténsia CSSM Manu-Fahi ne’ebé hahu hosi 2010 to’o 2017 ita muda nafatin katak muda hosi edifísiu ida ba edifísiu seluk, maibe ohin ita bele hetan edifísiu permanente i agora ami senti di’ak ona, tanba funsionáriu ida bele iha ona kadeira, meza ho komputadór ida iha sala ida idak", esplika Diretór CSSM Manu-Fahi.

Uluk iha edifísiu tuan, la iha espasu ba funsionáriu para atu halo servisu ho di’ak no la iha fasilidade ne’ebé mak sufisiente, maske ho difikuldade ne’ebé mak iha, la hamate sira nia espíritu atendimentu ba komunidade iha Munisípiu Manu-Fahi.

Antes halo inaugurasaun ba edifísiu refere, Ministra MSS akompanã husi DG-Serviços Corporativos-MSS, PNTL no autoridades lokais halao visita ba Osoario iha Luak, uma MDG’s, fatin Bé matan no  Sentru Eletrisidade iha Suco Betano.

Partisipa iha seremónia ne’e mak hanesan, Administrador Munisípiu Manu-Fahi ho nia Sekretáriu, Administradores Postu, Xefes Suku, Komandante PNTL, Diretóres Jerais, Diretóres Nasionais no Diretores Munisípius, Xefes Departamentus, Padre no Madre sira, Veteranus inklui Komunidade.