“MSS” Entraga Ró Funerál ba Komunidade Postu ...

Dep. Media 12 May, 2017 

Vise Ministru Solidariedade Sosiál  Eng. Miguel Marques Gonçalves “Manetelu”, entrega Ró Funerál ba Komunidade Postu Administrativu Atauro, Munisípiu Dili no hetan bensaun hosi Amu Pároku Ataúru, iha loron Sexta feira(12/05/2017).

Manetelu informa katak, Ró Funerál bele apoiu ona família tula mate isin husi Dili ba Ataúru, Ataúru ba Dili, no iha Ataúru laran ne’ebé mak labele asesu transporte trestre.

Vise haktuir, orsamentu ba halo Ró Funerál ne’e ho montante  U$.15.000 Dolar  Amerikanu, ne’ebé mai husi Orasamentu Jerál Estadu, tinan 2016.

Vise Ministru ne’e infoma liutan katak, manutensaun ba Ró Funerál ida ne’e rasik, tuir polítika Governu nian hodi halo mós desentralizasaun, hanesan prosesu ne’ebé mak lao hosi MSS, deskonsentra ona servisu dezastre naturál no mós servisu Funerál, inklui Karru Funerariu no mós Ró Runerál ida ne’e.

“Tanba ne’e, se ita haree ba politika ida ne’e responsablidade ba ona Munisípiu Dili nian, maibe tanba ita foin hahú, dala ruma sempre iha faillansu, iha servisu balu ne’ebé persiza atu trata, entaun MSS kontinua fó apoiu ba Munisípiu Dili, oinsá mak tau matan halo manutensaun ba Ró ida ne’e”, deklara Marques.

Iha biban ne’e, Jeca Smith hanesan Adjuntu Administradór Munisípiu Dili, informa katak, ohin ita hetan premu, oportunidade furak tebe-tebes, tanba istória foun ida ba Atauru katak, iha tan ró funerál ida, ne’ebé bele fasilita maluk sira ne’ebé karik maromak bolu, hodi tula hosi Ataúru mai Dili, Dili ba Ataúro no Ataúru laran rasik, ne’ebé mak kareta labele asesu.

“Hau hanesan Adjuntu Administradór Munisípiu Dili husu ba Ataúru oan sira hotu atu uza ho kuidadu fasilidade ne’ebé mak estadu fó”, deklara Smith.

Smith Nusu ba Administradór postu Ataúru, PNTL Ataúru, forsa Navál, tenke halo kooperasaun di’ak hodi haree para bele kuidadu fasilidade sira ne’e.

Iha fatin hanesan, Delfin Baptista Belo, grupu komunidade ne’ebé halo Ró Funerál ne’e informa katak, Ró Funerál ne’e ho nia kapasidade bele tula ema to’o na’in 20.

Mateus Belo, hanesan Administradór Postu Atauru hato’o mós katak kounidade Atauru sente haksolok, tanba esforsu tomak ne’ebé mai hosi MSS, ohin bele akontese istoria foun ida ba Atauru ho Ró Funerál.

Maske ami hetan ona Karru Funeráriu maibé kondisaun geográfika Ataúru mak ezije Governu hodi tau matan no ofrese Ró funerál ida ne’e ba Atauru.

Partisipa iha entrega Ró Funeraál ne’e mak, Amu Pároku Ataúru, Diretór Jerál Protesaun Sosiál no Asuntus Kombatenetes da Libertasaun Nasionál, Eugénio João de Maria Soares, Komandante Forsa FDTL Ataúru, Komendante Polísia PNTL Ataúru, Diretór Munisípius, funsionárius MSS, no komunidade Ataúru.