VISE-MINISTRU MSS INAUGURA EDIFÍSIU CSSM COVALIMA

Dep. Media 10 June, 2017 

 

Vise-Ministru Solidariedade Sosiál-MSS, Eng. Miguel Marques Gonçalves “Manetelu” Inaugura Edifisíu Sentru Solidariedade Sosiál Munisípiu Covalima-CSSMC, iha Aldeia Sukabi Laran, Suku Suai Loro, Munisípiu Covalima, iha loron Sábadu-Feira (10/06/2017). Edifísiu refere, sei sai fatin atendimentu ba populasaun iha Posto Administrativu hitu (7) mak hanesan Posto Administrativu Fatululic, Fatumean, Fohorem, Zumalai, Maucatar, Tilomar  no Posto Administrativu Suai Vila rasik.

Iha oportunidade ne’e, Vise-Ministru, iha nia diskursu hateten, inaugurasaun edifisíu foun CSSM Covalima ida ne’e halo parte desentralizasaun nian, inklui mós armajen MSS ne’ebé sei rai sasán hodi ajuda vitíma dezastres sira. Tanba ne’e, Vise-Ministru husu ba funsionárius liu-liu Diretór CSSM Covalima, atu servisu ho didi’ak, iha ona fatin no fasilidade atu servi populasaun ne’ebé persiza MSS nia ajuda.

Vise Ministru mós hateten, misaun MSS nian boot teb-tebes, maibé bainhira atu implementa misaun ne’e ho di’ak, la’ós servisu MSS mesak, maibé presiza tebes kolaborasaun no kooperasaun hosi autoridades nomós komunidade tomak iha baze, tanba benefisiárius MSS ninian la’ós iha nasionál, maibé iha área remotas. Nasionál tenik Vise, tenta haka’as-an atu dezenvolve polítika no programa hodi bele responde no hamenus kiak iha Timor-Leste. Maibé bainhira iha baze la koopera ho di’ak iha nasionál, polítika no programa hirak ne’e sei la la’o ho di’ak, tanba ne’e presiza halo kooperasaun no koordenasaun nafatin ho diresoins, nomós departamentu sira iha nivel Munisípiu, Posto Administrativu to’o iha Suku sira.

Vise-Ministru realsa liu tan, MSS komesa hakbesik ninia prestasaun no atendimentu ba iha baze, tanba ne’e hahú ohin ba oin atendimentu sosiál Munisípiu sei atende diretamente hosi CSSM Covalima, bainhira kbiit atendimentu iha rejiaun la to’o mak foin re-enkamiña ba iha nasionál.

“Uma ne’e komunidade nian, bainhira persiza ajuda husi MSS, karik labele to’o iha nasionál, maibé hakat mai deit iha Munisípiu Covalima, bele simu sira no husi ne’e bele haruka informasoins ba nasionál i nesesidade iha ne’e maka harii armajen atu tau foos, no la kleur tan tau ekipamentus dezastre nian para dezastre ruma mosu, sira bele responde kedas,” dehan Vise Ministru.   

Ikus liu, Vise Ministru ne’e hato’o ba komunidade Munisípiu Covalima tomak katak, edifisiu ida ne’e halo laos buat seluk maibe atu lori servi ita bo’ot sira diak liu tan no politika mai husi Governu kona-ba desentralizasaun ne’e hanesan lori ita nian servisu atu hakbesik liu tan ba iha komunidade.

Iha fatin hanesan Direitór CSSM Covalima, Amandio Amaral Freitas hateten, edifisiu foun ida ne’e inaugura atu MSS kontinua nafatin servisu no fó atendimentu iha área sosiál nian ho di’ak ba povu, liu-liu iha Munisípiu Covalima, inklui Posto Administrativu hitu (7) ne’ebé persiza Ministériu nia tulun.

Direitor hateten, Ministériu aloka orsamentu ba konstrusaun edifísiu CSSM Covalima ho montante orsamentu U$. 281,285,82, hala’o hosi Kompañia Roman Junior  Unip. Lda, ho nia durasaun tinan ida resin, hahú hosi Agostu 2015 no remata iha Marsu 2017. Entretantu konstrusaun armajen CSSM ho montante orsamentu U$. 104,827,85 no mós reabilitasaun ba Ossuáriu ho montante orsamentu U$. 16.000, ne’ebé kuaze remata.

Iha seremonia ne’e direitamente Vise-Ministru asina Plaka no Amo Paroco Suai Pe. Sebastião Ximenes mak  fo bensaun ba edifísio CSSM Covalima.

Partisipa iha serimónia inaugurasaun ne’e, Administradór Interino Munisípiu Covalima, Afonso Nogueira Nahak, Adjuntu Polísia Munisípiu Covalima,  Inacío Amaral, Diretór Jerál Protesaun Sosiál no Asuntu Kombatentes Libertasaun Nasionál-MSS, Eugénio João Amado de Maria, Xefe Kabinete Vise-Ministru MSS, Diretór Kompañia Roman Junior Unip. Lda, Jose Amaral,  Diretores Nasionais, Diretores Munisípius, Diretór Uma Mahon Esperansa ba Feto Salele, Me. Santina Imaculada de Oliveira, SSpS, Xefes Departamentus MSS, Funsionárius MSS no Komunidade sira.