TARA-BANDU IHA POSTU ADMINISTRATIVU TURISCAI

Dep. Media 30 June, 2017 

Ministériu Solidariedade Sosiál-MSS hamutuk ho ONG Kadalak Sulimuto Institute-KSI, Luta Ba Futuru-LBF, inklui Autoridade Lokais no komunidade Postu Administrativu Turiscai realiza seremónia Tara-Bandu, iha Munisípiu Manufahi, Postu Administrativu Turiscai, Loron Sesta-Feira, (30/06/2017), ho nia tema ‘Tara-Bandu nudar meus hodi hametin unidade, hamenus konflitu no hasa’e dezenvolvimentu.

Relasiona ho atividades refere, Diretór Jerál (DJ) MSS ba asuntus Protesaun Sosiál no Kombatentes Libertasaun Nasionál, Eugénio João A. de Maria Soares hateten, tara-bandu hanesan seremónia rituál ida ne’ebé Timor halo desde hosi beiala sira. Tara-bandu sei lori dezenvolvimentu di’ak ba ekonomia no sei bele rezolve problema sosiais balun ne’ebé komunidade sira enfrenta, liu-liu iha komunidade Postu Administrativu Turiscai.

“Tara-bandu ne’e atu fó moris di’ak ba ita, nune’e wainhira ita la kumpri ita nia obrigasaun, bandu sei tara fali ita, katak kastigu ita iha ita nia moris tuir mai,” dehan Diretór Jerál.

Haktuir DJ, Governu sei la taka matan, katak sei halo ninia kontinuasaun atu harii futuru ida ne’ebé mak di’ak ba povu tomak, liu-liu ba jerasaun sira aban bainrua nian. Karik la halo tara-bandu ho di’ak, la kolabora no la partisipa, maka dezenvolvimentu sei la la’o ho di’ak.

Iha fatin hanesan, Lia Nain, Afonso Sarmento hateten, tara-bandu ida ne’e halo, liu-liu tanba haree ba problema báziku ne’ebé komunidade Postu Administrativu Turiscai infrenta. Tara-bandu ne’ebé mak ohin realiza halai liu ba buat importante tolu, mak hanesan, tara-bandu ba natureza, katak komunidade ida-idak tenke respeitu ai-horis sira, bee, rai lulik, no labele tesi ai arbiru, ne’ebé to’o ikus bele hamosu inundasaun. Ida seluk mak halai liu ba relasaun entre ema ho ema, liu-liu liga ba violénsia seksuál, katak la bele deskonfia malu hanesan buan, abandona nia feen no oan sira, ikus liu mak relasaun entre ema ho animál.

Dehan Afonso, tara-bandu ne’e kuandu implementa didiak bele fó forsa ba autoridade ou lideransa komunitária sira hodi nune’e sira bele iha kbi’it atu foti desizaun ruma. Wainhira komunidade sira kontra regras ne’ebé ohin asina, iha buat rua deit mak sei halo, primeiru wainhira problema ne’e iha relasaun ho krime, sei la rezolve tuir deit kultura, maibé sei rezolve tuir dalan legál, maibé ba problema sira ne’ebé mak halai liu ba kultura sei rezolve tuir kultura ninian.

Iha biban ne’e Lian Na’in husu atu, komunidade tomak iha Postu refere kumpri no halo tuir desizaun ka regulamentu ne’ebé iha ona konkordansia hamutuk, nune’e bele halo mudansa ba moris di’ak.

Partisipa iha seremónia tara-bandu ida ne’e mak Adjuntu Administradór Munisípiu Manufahi, Arantes Isac Sarmento, Diretóra Nasionál Prevensaun Konflitu Ministériu Interiór, Komandante PNTL Munisípiu Manufahi ho nia Membru, F-FDTL, Reprezentante Igreja, Lia Nain hosi Suku 11, inklui komunidade.