SERVISU ATENDIMENTU SOSIÁL CSSM LAUTÉM

Dep. Media 10 August, 2017 

Centru Solidariedade Sosiál Municipiu Lautém-CSSML, estabelese ho nia papél atu halo atendimentu sosiál iha Municipiu, hanesan ain no liman Ministériu Solidariedade Sosiál nian iha baze. Refere ba polítika ne’ebé iha, Diresaun Munipiu implementa ona programa nasionál hanesan asuntu Dezastre Naturais no Veteranus. Diresaun ne’e rasik halo atendimentu kobre Posto Administrativu lima (5) mak hanesan Iliomar, Lautém, Luro, Tutuala no Lospalos Villa rasik.

Atu haree besik liu implementasaun programa MSS iha Diresaun refere, iha loron 10 fulan Agostu tinan 2017 Média MSS rekolla dadus no informasaun hanesan meius atu públiku bele hatene rezultadu servisu ne’ebé Diresaun Munisípiu halo.

Relasiona ho implementasaun programa MSS iha Munisípiu Lautém, Diretor CSSM Lautém, Paulo da Silva Pinto hato’o katak, Papél Centru Solidariedade Sosiál Munisípius bazeia ba dekretu lei No. 3/2015 de 26 de agostu iha artigu 23 ko’alia kona-ba delegasaun teritoriál, oinsá atu transmisi no implementa programa sentrál nian hodi habelar iha komunidade liu-liu mak hanesan asuntu dezastre naturais no veteranus.

Diretór ne’e esplika liu tan, tipu dezastre akontese ne’e maioria anin bo’ot no udan, ahi han ne’e porvolta familia kada 3 ka 4 hanesan ne’e maka akontese iha suku parlamentu foin lalais ne’e, ahi han uma no suku Daudere mós akontese hanesan, maibe kona-ba rai halai ne’e seidauk, no barak liu maka anin sobu no udan bo’ot.

Diretor hateten, kona-ba dezastre la espera no kona-ba polítika Governu liu husi ministériu ida ne’e, totál estraga iha kategoria 3 maka hanesan aat kamaan, aat natoon no aat liu. Ida ne’e maka durante ne’e servisu iha área dezastre naturais ninian, maibe tipu ida ne’e depende ba rezultadu verifikasaun maka hatudu ninian tipu ida ne’e.

Diretór ne’e mós dehan, kona-ba veteranus koordenasaun entre konsellu veteranus la’o di’ak, liu-liu ba iha programa rekolla restus mortais, osuáriu ou jardim ne’ebé maka iha, no ko’alia kona-ba lista jerál hanesan se maka iha direitu atu hetan sobrevivente mártires sira ne’e lista sira ne’e direitamente iha nasionál, maibe dadus sira ne’ebé maka iha Munisípiu Lautem ba sira ne’ebé hetan ona pensaun ida ne’e hamutuk 1337 pesoas.

Iha fatin hanesan, Administradór Munisípiu Lautem, Zeferino dos Santos Sequeira hato’o, haree ba lei No. 3/2016 kona-ba deskonsentrasaun administrativu servisu 2 maka tutela direita mai iha adminstrasaun maka, asaun sosiál no jestaun dezastre naturais, tanba ne’e maka diresaun servisu 2 ne’e sira halo servisu tuir orientasaun administrasaun munisípiu.

“Agora dadauk iha Munisípiu Lautem desde uluk ate agora liña koordenasaun entre CSSM Lautem ho Administrasaun Munisípiu buat hotu-hotu la’o diak,”dehan Zeferino.

Administradór Zeferino hatutan, agora kona-ba CSSM Lautem konserteza sira haree ba buat barak, maibé servisu espesífiku ne’ebé liga mai iha administrasaun munisípiu iha area 2 maka ami kaer, no seluk ne’e liu hosi sira nia pontu fokál. Servisu saida deit maka hala’o iha munisípiu sempre liu hosi orientasaun administrasaun munisípiu tanba iha administrasaun munisípiu maka hatene nesesidade besik liu no administrasaun munisípiu liu hosi nia estrutura hahú hosi munisípiu, postu administrativu to’o iha suku.