SEREMÓNIA DESPEDIDA MINISTRA NO VISE-MINISTRU MSS

Dep. Media 25 August, 2017 

Ministra Solidariedade Sosiál, Isabel Amaral Guterres no Vise-Ministru Solidariedade Sosiál, Miguel Marques Gonçalves “Manetelu” halo seremónia despedida ho funsionáriu Ministériu Solidariedade Sosiál-MSS, Instituisaun Solidariedade Sosiál-ISS no parseiru sira. Seremónia refere hala’o iha edifísiu sentrál MSS Kaikoli-Dili, loron Sesta-Feira, (25/08/2017).

Iha biban ne’e, Ministra Solidariedade Sosiál, Isabel Amaral Guterres iha nia diskursu hateten, husu ba funsionáriu sira atu kontinua nafatin servisu ne’ebé imi hala’o dadaun to’o agora no hadia povu nia moris, servi sira ho domin hanesan imi hatudu dadaun ona.

Ministra realsa liu tan, parabens ba imi nia servisu no husu ba imi katak hadomi no fó liman nafatin ba malu karik naksalak oan ruma buka atu resolve e importante liu maka ida ne’e no hadia ita nia maluk sira nia moris.     

“Atu halo avaliasaun ba iha tinan 5 nian maibe hau iha deit liafuan badak halo avaliasaun ida ne’e hanesan hakerek ne’e hau dehan “obrigada pela vossa dedicação sacrifíçio e amor trabalho” ne’e hau nia avaliasaun ba imi hotu,” dehan Ministra.

Iha fatin hanesan, Vise-Ministru Solidariedade Sosiál, Miguel M. Gonçalves “Manetelu” hato’o, agradesimentu ba funsionáriu sira tanba prosesu servisu ne’e mai husi ita bo’ot sira atu servi no iha espíritu unidade para atu servi e atendimentu ne’ebé diak ba ita nia ema ne’ebé kbi’it laek  no kontinua servisu ho governasaun tuir mai.

Vise-Ministru hateten liu tan katak, hanesan funsionáriu públiku fó imi nia dedikasaun ne’ebé diak laos ba membru governu maibe atu liberta ita nia povu husi susar no mukit, buat sira ne’e hotu maka ita luta katak ita liberta ita nia patria ita tenki liberta ita nia povu.

Ikus liu Vise-Ministru hato’o, apresiasaun ba Komisaun Homenajen, Xefe Gabinete Ministra no Vise-Ministru, Diretor-Jeral MSS nain 2, Diretores Nasionais, Diretores Municipius, ISS, asesor nasionál no internasional e parseiru sira.

Iha seremonia ne’e direitamente Ministra no Vise-Ministru simbolikamente entrega sertifikat ba Diretór DNDS, Florêncio Pina Dias Gonzaga, Diretora Centru Solidariedade Sosiál Municipiu Aileu, Catarina de Araújo, ISS no parseiru sira.

Director-Jeral MSS nain 2 ho Instituisaun Solidariedade Sosiál-ISS no Centru Nasionál Reabilitasaun-CNR mós entrega souvenir ba Sua Excia. Ministra no Vise-Ministru MSS.

Partisipa iha serimónia despedida ne’e mak hanesan, Ex. Sekretariu Estadu Seguransa Sosiál, Victor da Costa, Diretór-Jeral Protesaun Sosiál no Asuntu Kombatentes Libertasaun Nasionál-PSAKLN, Eugénio João Amado de Maria Soares, Diretór-Jeral Servisu Korporativus, Rui Manuel Gago Exposto, Amo Paroco, Diretores Nasionais, Diretores Municipios, Xefes Departamentus, ISS, Asesor Nasionál no Internasional, parseirus no Funsionárius MSS.