MSS ENTREGA CARRU FUNERÁRIU BA AUTORIDADE MUNISÍPIU ...

Dep. Media 11 September, 2017 

Ministériu Solidariedade Sosiál-MSS, liu hosi Diretór-Geral Servisus Korporativus entrega ona carru funeráriu 4 inklui mós róo funeráriu 1 ba Autoridade Munisípiu Díli, hodi bele jere no atende funeráriu iha munisípiu Díli nian. Serimónia refere hala’o iha Edifísiu Munisípiu Díli-Matadoru, Loron Segunda-Feira, (11/09/2017).

Iha biban ne’e, Diretór-Geral Servisus Korporativus MSS, Rui Manuel Gago Exposto hateten, Ministériu Solidariedade Sosiál entrega carru funeráriu no róo funeráriu ho objetivu ida katak, komesa ba oin Munisípiu Díli mak fó atendimentu direta ba funeráriu iha Munisípiu Díli, ne’ebé durante ne’e jere hosi MSS.

DG esplika liu tan, Kareta  hamutuk 4 mak MSS entrega, 1 iha Autoridade Atauro, 3 iha presidente autoridade Munisípiu Díli hodi atende postu administrativu ne’ebé existe iha Munisípiu Díli nian. Iha tempu badak MSS mós sei entrega róo funeráriu ida para bele fó atendimentu ida ba komunidade sira ne’ebé lokaliza iha atauro.

Entertantu, Presidente Autoridade Munisípiu Díli, Gaspar Soares hateten, “kareta hirak ne’e sei jere rasik hosi autoridade Munisípiu Díli no oinsá Munisípiu Díli bele halo atendimentu ida di’ak liu tan ne’ebé antes ne’e hala’o hosi MSS, karik Munisípiu Díli la fó atendimentu ida ne’ebé di’ak, hau bele dehan Munisípiu Díli faila”.

Gaspar akresenta liu tan, Ema mate la haree ba oras, iha tempu saida deit ema bele mate, maibé oinsá Munisipiu Díli bele jere no halo atendimentu ida ne’ebé di’ak liu ba iha komunidade sira iha Munisípiu Díli. Atendimentu ne’e ho kedas hosi mate iha hospital ba iha uma no hosi uma ba iha semiteriu.

Partisipa iha seremónia ne’e mak, Adjuntu Presidente Autoridade Munisípiu Díli, Jeca Smith, Diretóra Administrasaun no Rekursus Humanus-MSS, Rosália da Paixão Faria, Xefe Suco Becora inklui Funsionárius iha Presidente Autoridade Munisípiu Díli.