Funsionárius MSS Simu Ministra Foun

Dep. Media 18 September, 2017 

Relasiona ho formasaun VII Governu Konstitusional, funsionárius Ministrériu Solidariedade Sosiál (MSS) hamutuk ho ministra sesante Dra. Isabel Amaral Guterres, Vise-Ministru sesante  Eng. Miguel Marques Gonçalves ‘Manetelu’ no Prezidente Komisaun Omenajen Sr. Virgilio Smith,  simu Ministra foun, Dra. Florentina da Conceição Pereira Martins Smith iha edifisiu sentrál MSS Kaikoli-Díli, Segunda Feira (18/09/2017).

Iha biban ne’e, Ministra foun akresenta, hanesan ministra foun, nia presiza integra relatóriu ne’ebé entrega ona hosi Ministra sesante, hodi haree ba atividade tomak, iha planu asaun ida ne’ebé mak eskreve iha planu asaun 2017 nian, no sei haree ba tinan finanseíru,  ne’ebé sei taka iha Dezembru 2017.

Tuir Ministra MSS foun ne’e, ba oin nia sei haree ba planu prioridades ne’ebé mak iha ona hodi kontinua, hanesan programa Bolsa da Mãe, Idozus Inválidus, Dezastres Naturais, nomós Asuntus Veteranus, ne’ebé mak oras ne’e dadauk iha hela diskusaun nia laran. Asuntus Veteranus tuir Ministra, persiza hadiak tan buat balun, i presiza harii Konsellu Veteranus.

Iha okaziaun ne’e, Ministra MSS, Dra. Florentina Smith simu relatóriu tinan 5 (2012-2017) hosi Ministra sesante, Dra. Isabel Amaral Guterres, no simu Relatóriu hosi Prezidente Komisaun Omenajen.

“Relatoiu ne’ebé mak entrega ona mai ha’u, ha’u sei buka tempu semana ida, para bele lé integra didi’ak, depois hanoin oinsá hamutuk para bele hala’o, la’ós deit servisu veteranus, maibé servisu ne’ebé mak engloba iha Ministériu Solidariedade Sosiál,” dehan Ministra.

Ministra hatutan, nia parte sei haree lei orgánika VII Governu Konstitusionál nian, karik iha buat balun ne’ebé mak pertinenti, persiza atu enkuarda ka bele haforsa di’ak liutan papél MSS nian.

Entertantu, Ministra sesante Dra. Isabel Amaral Guteres iha despedida husik hela rekomendasaun balun atu nun’e ministra foun bele toma konsiderasaun, hanesan dekretu lei harii konsellu veteranus ne’ebé iha hela meza Prezidente, lei protesaun labarik no kontinua mós programa seguransa sosiál rejime kontributibu no seluk-seluktan.