DESIMINASAUN RELATÓRIU SERVISUS FUNSAUN PÚBLIKU BA ...

Dep. Media 05 October, 2017 

Komisaun Funsaun Públiku hala’o sondajen ba Ministériu Solidariedade Sosiál hanesan primeira pilotu ba desiminsaun kona-ba rezultadu sondajen ne’ebé mak Komisaun Funsaun Públika hala’o kona-ba persepsaun públiku ou dezempeño funsaun públiku ninian, ne’ebé hala’o iha salaun Ministériu Solidariedade Sosiál (MSS), Kaikoli-Dili, Loron Kinta-Feira, (05/10/2017).

Iha biban ne’e, Ministra MSS Dra. Florentina da Conceição Pereira Martins Smith hateten, ida hanesan oportunidade ida diak tebes tanba Presidente Komisaun Funsaun Públiku ho nia Komisárius sira na’in tolu mai hato’o rezultadu sondajen ida ne’ebé mak foin hala’o iha tinan ida ne’e.

Ministra realsa katak persiza tebes funsaun públiku atu halao bom akompañamentu, tanba ne’e diak, persiza akompañia hamutuk, hodi avalia servisu, ho nune’e bele hamutuk mellora ka hadi’a.

“Ita dala ruma hala’o servisu iha terenu, ita hanoin katak buat hotu la’o di’ak, povu nia persepsaun bele dehan kontinua akompaña, liliu funsaun públika, akompaña hela ita nia atividade, ne’ebé hau hanoin atividade ne’e importante,” dehan Ministra MSS.

Tuir Ministra, MSS mak hala’o atendimentu sosiais, i hein sujestoins no observasaun ida ne’ebé mak di’ak atu kontribui, hodi nune’e bele hadi’ak di’ak liutan servisu lor-loron, tuir misaun no vizaun Ministériu nian.

Iha fatin hanesan Prezidente Komisaun Funsaun Públiku Dr. Faustino Cardoso, hato’o katak desiminsaun rezultadu sondajen ne’ebé mak Komisaun Funsaun Públika hala’o kona-ba persepsaun públiku ou dezempeñu funsaun públiku ninian, ohin hala’o iha MSS hanesan primeira pilotu hodi hato’o rezultadu espesífiku ba servisu ne’ebé mak MSS hala’o.

Prezidente KFP hatutan, ida ne’e sai nu’udar ponte referénsia ida ba iha governu foun hodi bele ajuda defini programa hirak ne’ebé mak atu hala’o iha tempu oin mai, durante períodu mandatu VII Governu, no nu’udar ponte ida atu buka halo melloramentu ba dezempeñu funsaun públika.

Partisipa iha desiminsaun ba rejultadu sondajen ne’e mak hanesan Sekretariu Estadu Asuntus Veteranus Sr. Andre da Costa Belo ”L4”, Diretór Jerál Protesaun Sosiál no Asuntus Combatentes ba Libertasaun Nasionál, Sr. Eugénio João Amado de Maria Soares, Diretór-Jerál Servisu Corporativus Sr. Rui Manuel Gago Exposto, Gabinete Ministra, Diretores Distritais no Nasionais.