Ministériu Rua Komemora Loron Mundiál Redusaun ...

Dep. Media 13 October, 2017 

Governu Timor-Leste liu husi Ministériu Solidariedade Sosiál, Ministériu Defeza no Seguransa, komemora loron mundiál redusaun risku dezastre iha Suku Aiserimou, Munisípiu Aileu, Sexta Feira (13/10/2017), ho nia tema, Uma Seguru-Redus Númeru Afetada.

Iha biban ne’e, Ministru Defeza no Seguransa, Jose Agostinho Sequera “Sumoco” hato’o katak, loron mundiál ba redusaun risku dezastre iha tinan ida ne’e nia alvu mak oinsá atu halo prevensaun, protesaun no redus ka hamenus númeru dezastre. Tuir nia, dezastre la,ós mai deit hosi natureza, maibé iha mós akontese tanba ema ninia hahalok, hanesan sunu rai, tesi ai arbiru no selu-seluktan.

Ministru mós hatutan, Timor-Leste nu’udar nasaun ida ne’ebé hetan mós impaktu hosi mudansa klimátika, provoka dezastres naturais kada tinan iha mundu tomak, hodi hamosu udan bot, bee sa’e, inundasaun, rai monu, rai halai, anin bot, ahi han rai, no seluktan, ne’ebé halo ema mate, kanek, no lakon sira nia sasan.

Nune’e mós Adjunta Administradór Munisípiu Aileu, Vitória Mesquita do Rego hateten,  natureza ne’e ema mak hein, tanba ne’e ema tenke halo limitasaun ba atetude ne’ebé mak la favorese ba natureza, ho nune’e ninia impaktu ema mak sei simu. Hanoin ba ida ne’e, Adjunta fó hanoin atu hotu-hotu kontribui hodi valoriza no dignifika nia-an rasik, hodi la fó risku mai ema.

Iha okaziaun ne’e, Diretór Jerál Protesaun Sosiál no Asuntus Combatentes Libertasaun Nasionál, MSS, Sr. Eugénio João Amado de Maria Soares hato’o katak,  Uma Seguru ne’e iha ona komplementariedade no suplementariedade. Ita nia Governu iha obrigasaun nomós atu ajuda, halo nusá populasaun bele iha kuñesimentu, hodi nia uma seguru, ne’e modifikadu ho modernizadu uituan ho saida mak bele tau iha uma laran, hanesan ba anin boot no inundasaun.

Tenik Diretór Jerál, uma seguru ne’e la’ós kestaun konstrusaun, maybe kestaun ho família. Família sira tenke iha kuñesimentu kona-ba saida mak sensiblizasaun ba risku dezastre naturais, no halo nusa mak sira bele hasees-an husi risku dezastre.

Nune’e mós Diretór Nasionál Risku Dezastre, MSS, Agostinho Cosme Belo, hato’o katak Timor Leste komemora loron mundiál redusaun risku dezastre ne’e, hanesan nasaun membru, ne’ebé iha komitmentu bazeia ba ekuadramentu SENDAI, ne’ebé adopta iha konferénsia mundiál iha Japaun, fulan Marsu tinan 2015.

Cosme informa mós, katak iha tinan 2017, MSS liu husi DNGRD hahú husi Janeiru, identifika no apoíu ona asisténsia umanitária ba emerjénsia no materiál kontrusaun hamutuk 2.044 xefes familias iha munisípiu 12, la inklui rejiaun outonomu Oecusse. Tuir nia, dadus ne’ebé mak atu rezolve no prosesa iha tinan ida ne’e, iha 1.258, ne’ebé mak afeta hosi anin sobu uma, ahi han uma, rai halai no bee sa’e.

Diretór ne’e hatutan, iha tinan ida ne’e, MSS mós aloka orsamentu fudus transferénsia hodi atende ona ba ai-kuadradu no maun ba obra, ho osan montante U$. 32.844 dolares Amerikanu,  hodi apoiu ona xefes familias 1.059. 

Xefe Suku Lau-Usi, Adelina de Carvalho, hato’o agradese ba MSS no Banku Mundiál, tanba harii ona fatin (Uma Seguru-Redus Númeru Afetada_red) ba vulnerável no kbiit laek sira karik mosu dezastres ruma. Adelina mós subliña, ho estrada ne’ebé halo ne’e, bee mai karik labele ba komunidade sira nia uma, no estraga sira nia sasan.

Xefe Suku ne’e informa, projetu ne’ebé harii iha suku ida ne’e mak hanesan, sede evakuasaun, deker rua no barajen ida.