POPULASAUN MUNISÍPIU AILEU REALIZA TARA BANDU

Dep. Media 24 October, 2017 

Atu asegura estabilidade no meiu ambiente iha munisípiu nia laran, populasaun munisípiu Aileu, hamutuk suku 33 realiza Tarabandu alargada ida ne’ebé hala’o iha Aiserimou, Loron Terça-Feira, (24/10/2017). Atividade Tarabandu refere organiza hosi Administrasaun Munisípiu Aileu, servisu hamutuk ho Ministériu Solidariedade Sosiál, liu-liu Diresaun Nasionál Dezenvolvimentu Sosiál, Ministériu Defeza no Seguransa, The Asia Foundation, inklui World Vision.

Iha okaziaun ne’e, Ministra Justisa, Dra. Maria Ángela Guterres Viegas Carrascalão hateten, ko’alia Tarabandu, ita ko’alia kona-ba kustume, la ko’alia kona-ba regulamentu no lei.

“Se karik ita hakerek buat ida ne’e la sai ona kustume i sai fali lei no regulamentu, entaun ne’e la’os kustume, kuandu hakerek regulamentu ou lei tenke tuir konstituisaun rasik, haree kódigu prosesu sivíl no kódigu prosesu penál, la bele hatama se kódigu hirak ne’e kontra konstituisaun rasik, se lae ita labele hala’o servisu ida ne’e,” dehan Ministra Justisa.

Tuir Ministra, prinsipíu ida tara bandu ne’e di’ak, tanba proteje família, ambiente, animál no proteje ba buat barak, maibé kuandu ema halo sala tanba deit falta edukasaun, nune’e tenke haree mós edukasaun, atu oinsá bele hametin edukasaun ho kustume hotu-hotu iha komunidade nia le’et.

Entretantu Diretór Jeral, Protesaun Sosiál no Asuntus Combatentes Libertasaun Nasionál-MSS, Eugénio João Amado de Maria Soares hateten, kontiúdu Tarabandu ne’e ko’alia kona-ba ema ho ema, hanesan akontese violénsia doméstika, violénsia bazeia ba jenéru no violensia hirak seluk, ema ho animál, katak estraga ema nia animál arbiru, ema ho natureza katak hahalok ema nian estraga aihoris sira. Tara bandu ne’e tenke iha, se la kumpri maka tara fali ita, ne’e hanesan kastigu ida direta ou naturalmente ne’ebé uluk kedas beiala sira hala’o.

Nune’e mós, Lia Na’in, Alexandre de Araujo hateten, Tarabandu ne’e mai kedas hosi beiala sira, ne’ebé ho nia sintidu, kuandu aitahan ida, aitukan ida, bibi ain ida, manu ain ida kablehat, sira lori ba tara iha dalan sira, atu nune’e komunidade ne’ebé liu bele haree no hatene katak iha sinál tara bandu ida, nune’e sira bele kumpri no labele halo arbiru. Karik la iha sinál, dehan Araújo, entaun sira bele halo tuir sira nia hakarak, karik komunidade la kumpri ami sei fó sansaun bazeia ba kontiúdu regulamentu ne’ebé mak iha, i tara bandu ida ne’e halo atu komunidade sira kumpri.

Partisipa iha atividade ne’e mak hanesan, Vise-Ministru Administrasaun Estatal, José Anuno, Administradór Munisípiu Aileu, João Tilman do Rego, Diretores no Xefe Departamentus hosi MSS, Veteranus, Administradóres Postos Administrativus, Xefes Sukus, Xefes Aldeias, PNTL Munisípiu Aileu inklui Komunidades.