CSS MANATUTO NO CSS BAUCAU HETAN VIZITA HOSI ...

Dep. Media 26 October, 2017 

Depois lidera fulan ida iha VII Governu, Ministra Solidariedade Sosiál (MSS), Dra. Florentina Smith, hala’o primeira vizita ba iha Centru Solidariedade Sosiál (CSS) Manatuto no Baucau, inklui Instituisaun Solidariedade Sosiál (ISS) hanesan Kolejiu Manatuto, Centru de Dia Baucau, Putri Maria Yosef no Uma Pas Baucau. Vizita refere hala’o Loron Kinta-Feira (26/10/2017).

Iha oportunidade ida ne’e, Ministra MSS, Florentina Smith hateten, persiza halo duni vizita traballu, atu buka hatene no akompaña nafatin kondisoins i atividades saida mak MSS no CSS sira hala’o, nune’e mós bele kuñese di’ak ho funsionárius ne’ebé servisu iha CSS.

“Saida mak ohin sira hato’o ne’e sai hanesan informasaun ida ba ha’u nia traballu, nune’e hanesan Ministra ha’u bele kontribui no orienta diretores sira, tuir nesesidades ou traballu ne’ebé mak durante ne’e sira hala’o tiha ona”, dehan Ministra.

Ministra mós husu ba funsionárius sira atu servisu nafatin, tau nafatin profisionalizmu nu’udar funsionáriu públiku no servidór estadu, hodi hala’o knaar no servisu ne’ebé durante ne’e hala’o, nu’udar funsionárius públiku tenke asume responsabilidade servisu ho nune’e bele hadi’a di’ak liu-tan povu nia moris, liu-liu bele atende no ajuda benefisiárius sira nia problema.

Liga ba vizita ISS, Ministra hateten, objetivu vizita ba ISS ne’ebé hari’i hosi Madre sira, tanba Madre sira iha papél importante ida ne’ebé liga ho ema sira inválides, liga ho formasaun ba jovens sira, dala ruma ita hanoin Madre sira ne’e hala’o deit atividade espirituais, maibé sira mós iha kapasidade atu bele mobiliza rekursus hotu, atu halo transformasaun rekursus humanus ne’ebé sai matenek no kualidade liu. Atividade ida ne’e, tuir Ministra, persiza halo avaliasaun, nune’e bele kontinua nafatin ba oin atu bele halo interasaun ba iha komunidade hodi hakbesik liu-tan relasaun no servisu ba povu kbiit laek sira.

Nune’e mós Responsavel instituisaun Putri Maria Yosef, Madre Anastasia-PMY hateten, instituisaun ida ne’e halibur labarik sira hamutuk 22 pessoas ne’ebé mai hosi distritu ne’ebé diferente ho tipu moras ne’ebé diferente, mak hanesan defisiénsia tilun, mentál no defisiénsia intelektuál. Apoiu ne’ebé durante ne’e sira hetan primeiru mai hosi kongregasaun rasik no sira mós hetan osan oituan hosi MSS, inklui aihan hanesan foos, mina, supermi, nsst. Apoiu ne’ebé sira simu hosi MSS kada fulan tolu dala ida. Labarik hirak ne’e, hetan akompañamentu hosi profesores hamutuk ema na’in hitu, inklui mós Madre na’in tolu.

Vizita Ministra ida ne’e hetan akompañamentu hosi Diretór Diresaun Nasionál Dezenvolvimentu Sosiál-DNDS, Florenço Pina Dias Gonzaga, Diretores Centru Solidariedade Sosiál-CSS Manatuto no Baucau, Xefe Gabinete Sekretáriu Estadu Veteranus, Xefe Departamentu Rejistu Instituisaun Solidariedade Sosiál no Xefe Protesaun Labarik.