MSS REALIZA DIÁLOGU IHA POSTU ADMINISTRATIVU BAGUIA

Dep. Media 27 October, 2017 

Ministra Solidariedade Sosiál, Dra. Florentina Smith, hamutuk ho Diretór Diresaun Nasionál Dezenvolvimentu Sosiál-DNDS no Prezidente Autoridade Munisípiu Baucau, Xefe Sukus, Xefe Aldeias, inklui komunidades, realiza diálogu ne’ebé foka liu-ba atendimentu no servisus Ministériu Solidariedade Sosiál-MSS nian. Diálogu ne’e hala’o iha Suku Devawasi, Postu Administrativu Baguia, Munisípiu Baucau, loron Sesta-Feira (27/10/2017).   

Iha diálogu ne’e, Ministra Solidariedade Sosiál, Dra. Florentina Smith hateten, objetivu diálogu ida ne’e atu rona komunidade sira nia preoukupasaun no hanoin, tanba dala ruma MSS simu no le’e deit relatóriu, la konsege intende di’ak saida mak komunidade hanoin no persiza, liu-liu liga ba asuntus implementasaun programa no servisus MSS nian. 

“MSS sei fó nafatin apoiu ba kualker atividades ne’ebé ligadu ho programa MSS, tanba ne’e ha’u mai atu rona komunidade sira, no akomoda hanoin hirak ne’e para bele dezenvolve di’ak liu tan planu no programa MSS nian iha futuru”, dehan Ministra.

Seluk hosi diálogu, loloos iha mós serimónia Tara Bandu, maibé eventu ida ne’e adia fali ba loron seluk. Relasiona ho Tarabandu ne’ebé adia ne’e, Ministra esplika, atividade ida ne’e la’ós kansela, maibé seidauk iha intendementu  di’ak kona-ba regulamentu internu, ne’ebé durante ne’e sira iha. Regulamentu internu ne’ebé regulariza tiha ona, tuir Ministra, persiza grupu ida atu fó hanoin, maibé hanoin hirak ne’e seidauk akomodativu, tanba ne’e persiza halo diskusaun di’ak liu tan, depois bele transforma fila fali ba iha regulamentu internu ruma atu hakesi sira, tanba Tara Bandu ne’e ninia intendimentu ne’e luan. Ko’alia Tara Bandu, tenik Ministra, ne’e liga ema ho fauna, liga ema ho florestál, ema ba ema, tanba ne’e persiza komunidade hotu-hotu bele tuur hamutuk hodi haree deside saida mak sira bele foti atu sai hanesan medidas forti, para bele prevene buat ruma ne’ebé atu akontese iha komunidade.

Entertantu, Prezidente Autoridade Munisípiu Baucau, António Guterres, husu ba xefe suku na’in tolu, kompostu hosi Suku Alawa Leten, Alawa Kraik no Suku Devawasi, atu reuni fila fali ho konssellu suku sira hodi lori fali ba aldeia ida-idak atu bele konsulta fali ho komunidade sira, tanba povu mak na’in ba regulamentu ne’ebé mak iha, i buat hotu-hotu tenke mai hosi povu ne’ebé bolu dehan regulamentu ou norma suku ne’ebé mak própriu. Tuir Prezidente Autoridade Munisípiu Baucau, regulamentu ne’ebé iha ona, seidauk halo konsultasaun másimu ba komunidade i seidauk akumulativu hanoin hotu-hotu. Ho nune’e husu ba komunidade sira atu kolabora ho xefe suku no xefe aldeia sira, hodi bele tau hanoin hamutuk kria regulamentu ida ne’ebé mak kompletu no akumulativu para tara bandu ida ne’e bele realiza iha futuru.