FUNDASAUN KLIBUR DOMIN HETAN VIZITA HOSI MINISTRA ...

Dep. Media 10 November, 2017 

Ministra Solidariedade Sosiál, Dra. Florentina da Conceição Pereira Martins Smith, akompaña hosi Diretór Jerál Protesaun Sosiál no Asuntus Combatentes da Libertasaun Nasionál, Eugénio João A. de Maria Soares, hala’o vizita traballu ba Fundasaun Klibur Domin (FKD), ne’ebé hatutan servisu MSS nian iha área defisientes, moras mentál no tuberculoze, inklui ema kbi’it la’ek sira. Vizita ne’ebé hala’o iha Loron Sexta-Feira, (10/11/2017) ne’e, ho nia intensaun atu haree besik liu programa no atividades ne’ebé durante ne’e FKD implementa.

Iha oportunidade ne’e, Ministra MSS, Dra. Florentina Smith hateten, vizita traballu mai iha Fundasaun Klibur Domin, atu bele observa no akompaña atividades no programas ne’ebé fundasaun ne’e hala’o, hodi nune’e ba oin saida mak MSS bele hatutan no kontinua apoiu ba fundasaun ida ne’e, tanba fundasaun ida ne’e importante no persiza duni MSS atu tau atensaun.

Ministra akresenta liu tan, hakarak observa besik atu bele haree ho matan no koperasaun saida mak persiza atu halo entre FKD ho MSS ba iha futuru. Iha observasaun ne’e, dehan Ministra, alende orsamentu ne’ebé mak MSS fó apoiu, sira mós nafatin hetan difikuldade finanseiru, falta rekursus umanus, persiza lei ruma atu bele haforsa fundasaun, hodi bele hala’o sira nia knaar no ho di’ak liu-tan iha futuru.

Nune’e mós Diretór Ezekutivu Fundasaun Klibur Domin, Joaquim Freitas Soares hateten, atividade ne’ebé mak hala’o iha fundasaun ne’e mak haree ba sentru internamentu ba moras no defisientes sira, ne’ebé fundasaun bele akomoda iha fatin ida ho total ema na’in 60. Programa seluk mak kona-ba moras tuberculoze movel, ne’ebé implementa iha komunidade, liu-liu iha Munisípiu Liquiça, Ermera no Maliana hodi detekta maluk sira ne’ebé sofre moras tuberculoze hodi halo tratamentu no edukasaun. Iha mós programa defisiénsia baze komunidade ne’ebé ita apoiu ba maluk sira defisiénsia iha komunidade hodi fó asisténsia saúde, sosiál, fornese ekipamentu, bee no saneamentu. Apoiu sira ba eskola ne’ebé implementa desde tinan 2000 to’o agora.

Fundasaun ida ne’e finansia hosi fatin tolu mak hanesan, Ministériu Solidariedade Sosiál, Ministériu Saúde no doadór balu hosi Australia. Maske nune’e, diretór ne’e informa, orsamentu sei menus atu kobre atividades hotu, i relasiona mós ho rekursu umanu ne’ebé sei limitadu, entermus kapasidade, esperiénsia no kualidade servisu, ne’ebé persiza hadi’a, tanba sai hanesan obstaklu ida. Seluk fali mak liga ba komunidade ne’ebé sei menus kuñesimentu kona-ba asuntu defisientes no moras tuberculoze, ne’e persiza edukasaun hodi hasa’e sira nia kuñesimentu.

Hafoin vizita Fundasaun Klibur Domin, Ministra ho kometiva kontinua vizita ba edifísiu MSS-Bemori, liu-liu ba Diresaun 3 mak lokaliza iha ne’ebá, kompostu hosi Diresaun Nasionál Dezenvolvimentu Sosiál-DNDS, Diresaun Nasionál Gestaun Risku Dezastres-DNGRD no Sentru Solidariedade Dili, inklui Departamentu Transporte Funeráriu. Vizita ida ne’e, atu observa servisu tomak ne’ebé diretores no funsionárius diresaun 3 ne’e hala’o iha terenu, tanba tuir Ministra, servisu hirak ne’e importante tebes no direta ba komunidade nia nesesidade. Iha parte seluk, vizita ne’e atu hametin liu-tan liña koordenasaun ba servisu hotu-hotu, fó apoiu no reforsa-tan diresoins sira hodi bele hala’o nia knaar.

Vizita ida ne’e, hetan mós akompañamentu hosi Diretór Jerál Korporativu-MSS, Rui Manuel Gago Exposto, Diretór Nasionál Asisténsia Sosiál, Mateus da Silva, Diretór Nasionál Dezenvolvimentu Sosiál-DNDS, Florenço Pina Dias Gonzaga nomós Xefe Departamentu sira.