MINISTRA MSS HALO VIZITA TRABALLU IHA MUNISÍPIU ...

Dep. Media 29 November, 2017 

Ministra Solidariedade Sosiál-MSS, Dra. Florentina da Conceição Pereira Martins Smith, halo vizita traballu ba Ossuáriu (Jardim Herois) iha Ugues-Postu Administrativu Maukatar, Kolégio Horsina Maukatar, Konstrusaun Sentru Evakuasaun Vítima Dezasatre no Sentru Esperansa ba feto ka uma Mahon Salele. Vizita refere hala’o iha Munisípiu Kovalima, iha loron Kuarta-Feira (29/11/2017). 

Iha biban ne’e Ministra hateten, vizita traballu ne’e hodi haree asuntus ne’ebé importante, nune’e bele integra nafatin programa asaun sosiál MSS nian no kontinua fó apoiu ba programa ne’ebé iha.

Ministra mós husu atu Diretores no funsionárius sira atu servisu ho di’ak no hatudu profesionalizmu, hodi hala’o knaar no servisu durante asume responsabilidade ho di’ak, hodi bele tulun no atende benefisiáriu sira nia difikuldade.

Ministra MSS realsa liu tan, informasaun saida deit mak ohin sira hato’o, ne’e hanesan responsabilidade MSS ninian, no persiza halo duni vizita traballu, atu nune’e buka hatene kondisaun no atividade saida mak MSS hala’o durante  ne’e seidauk kompleta, no bele rona rasik para hadi’a di’ak liu-tan.

“Prekupasaun ohin sira hato’o ne’e, hanesan liña kordenasaun ne’ebé di’ak, atu haree liu ba implementasaun programa saida deit mak seidauk realiza no programa ne’ebé mak iha ona bele kontinua halo di’ak, atu iha futuru bele hadi’a di’ak liu-tan povu nia moris, bazeia ba servisu MSS nia iha área hotu-hotu”, dehan Ministra.

Vizita ida ne’e hetan akopañamentu hosi, Diretór Jerál Protesaun Sosiál no Asuntus Kombatentes Libertasaun Nasionál, Eugénio João Amado de Maria Soares, Diretór Nasionál Jestaun Risku Dezastre-DNJRD, Agostinho C. Belo, Diretór Sentru Solidariedade Sosiál Munisípiu Kovalima-CSSMK, Amandio A. Freitas, Xefes Departamentus, Asesores Nasionais no Funsionáriu MSS sira.