MSS REALIZA NATÁL HAMUTUK HO PRIZONEIRUS-GLENO

Dep. Media 22 December, 2017 

Depois Natál hamutuk iha Prizaun-Becora, Ministra Solidariedade Sosiál, Florentina Smith, Vise Ministru Justisa, Sebastião Dias Ximenes no Sekretáriu Estadu Juventude i Traballu, Nivio Leite Magalhães kontinua hala’o Natal hamutuk ho Prizoneirus-Gleno, inklui guarda prizonais hodi enkoraja no fó ksolok Natal-2017 no tinan foun 2018. Atividade refere hala’o iha Munisípiu Ermera-Gleno, Loron Sexta Feira, (22/12/2017).

Iha okaziaun ne’e, Ministra Solidariedade Sosiál, Florentina Smith hateten, Ministériu Solidariedade Sosiál-MSS hamutuk ho Ministériu Justisa no Sekretáriu Estadu Juventude hala’o Natal hamutuk ho prizoneirus sira, ne’ebé sai ona hanesan programa regulár hosi MSS rasik, ho objetivu ida atu halibur hamutuk ho prizoneirus sira  no hakarak solidariza, tanba sira iha situasaun ida diferente ho ita ne’ebé selebra Natal hamutuk ho ita nia família. Tamba ne’e, tenik Ministra, atividade ida ne’e importante tebes atu ita hala’o nune’e bele partilla no hamenus oituan sira nia sentiment tristeza.

Ministra mós fó nafatin korajen ba prizoneirus sira no hakarak deseja nafatin atu sira bele hetan isin di’ak, haree malu di’ak no fó Natál kmanek ba sira ho nia família tomak, no deseja tinan foun ne’ebé sei lori perspektiva foun, hanoin foun ba maluk sira, atu wainhira fila ba iha sosiedade nia leet sira sai ema ne’ebé di’ak liu no ema ne’ebé kontribui ba família no sosiedade.