VIZITA TRABALLU MINISTRA SOLIDARIEDADE SOSIÁL BA ...

Dep. Media 22 December, 2017 

Ministra Solidariedade Sosiál, Florentina Smith hala’o vizita traballu ba Sentru Solidariedade Sosiál Munisípiu Ermera-SSSME inklui Asrama Lar Do Bom Samaritano-Lauala. Antes ne’e, Ministra halo ona vizita traballu ba Sentru Solidariedade Sosiál-SSS (6) no Instituisaun Solidariedade Sosiál-ISS (14) kompostu hosi Munisípiu Dili, Manatuto, Baucau, Viqueque, Suai no Lospalos. Vizita refere hala’o iha Munisípiu Ermera-Gleno, Loron Sexta-Feira, (22/12/2017).

Iha vizita ne’e, Ministra Solidariedade Sosiál, Florentina Smith hateten, objetivu vizita ne’e atu hasoru malu ho diretór ho ninia funsionárius tomak atu bele rona no observa ba situasaun real saida mak sira enfrenta iha servisu fatin nomós iha terenu, liu-liu fó atendimentu ba komunidade iha munisípiu Ermera. “hosi observasaun ne’e hau hare’e katak sira iha duni progresu servisu ne’ebé mak durante ne’e hala’o i hanesan ministra tau nafatin konsiderasaun ba sujestaun hosi funsionarius sira ne’ebé hato’o ona, ida ne’e mós sai hanesan sasukat ba hau, oinsá hau bele servisu no bele hatene situasaun kada munisípiu hodi bele halo planu no programa ba iha kada munisípiu nian rasik”.

Relasiona ho vizita ba Asrama Lar Do Bom Samaritano, dehan Ministra, atividades ne’ebé sira hala’o di’ak tebes i persiza fó apoiu nafatin hosi MSS no atividade ida ne’e persiza haree, akompanha, fiskaliza, observa atu bele hatene ninia realidade, tamba Atividade instituisaun ida ne’e mós bele hatutan no hakman servisu Ministériu nian i Ministériu iha konsiderasaun atu tau nafatin orsamentu hodi finansia sira nia atividades.

Entertantu, Diretór Instituisaun lar do bom Samaritano, Deonizio Joanico Bareto da Silva hateten,         Objetivu hari’i fatin ida ne’e mak hakarak perpara joven sira ne’ebé preparadu ba futuru nasaun ida ne’e, atividade lor-loron labarik sira nian mak, ba eskola, Kursu komputadór, língua, kustura, no hanorin sira oinsá atu bele moris mesak  i la depende ba ema seluk hanesan kuda modo, tein nsst.

Total labarik sira hamutuk 80 kompostu hosi Mane 40 no Feto 40.

Vizita traballu Ministra ne’e hetan akompaña hosi Diretór Jerál Servisu Korporativu, Rui Manuel Gago Exposto, Diretór Jerál Protesaun Sosiál no Asuntus Kombatentes Libertasaun Nasionál, Eugénio João Amado de Maria Soares, Diretór SSSME, João Bosco de Jesus Mendonça, Diretór Nasionál Dezenvolvimentu Sosiál-DNDS, Florencio Pina Dias Gonzaga, Xefe Gabinete Sekretáriu Estadu Veteranus.