MINISTRA MSS MONITORIZA NO INAGURA PROJEITU ...

Dep. Media 22 January, 2018 

Ministra Solidariedade Sosial Dra. Florentina  da Conceição Pereira Martins Smith hala’o monitorizasaun no inagurasaun ba projeitu balun hosi projetu korredór dezenvolvimentu Estrada Dili-Ainaro, ne’ebé halo ona investimentu hamutuk entre Governu Timor-Leste ho Banku Mundial, ho objetivu atu atualiza infraestruturas estrada ne’ebé liga Dili kapitál ba Munisípiu Ainaro. Atividades ne’e realiza hahú husi Dili, Ermera, Aileu, Ainaro no remata iha Munisípiu Manufahi, iha loron 22 to’o loron 26 Janeiru 2018.

Iha monitorizasaun ida ne’e Ministra informa katak, projetu korredór Dili-Ainaro núdar projetu ida di’ak tebes. Servisu ne’ebé mak sira hala’o “ami” akompaña ho di’ak, nafatin iha boa kooperasaun ho doadores sira, liuliu hanesan UNDP no Worldbank, ne’ebé sira prontu nafatin fó apoiu ba projetu ida ne’e, tanba sei iha nafatin kontinuidade tuir orsamentu ne’ebé MSS asina akordu ho UNDP, ho montante milaun ida dollar Amerikanu, ne’ebé atu ezekuta iha tinan ida ne’e.

Rezultadu monitorizasaun ne’ebé mak hala’o, tuir Ministra, katak hamutuk ho parseira sira konklui ona, atu iha relatóriu ida hodi hare to’ok rekomendasaun hirak ne’ebé mak autoridades lakois sira rekomenda, nune’e bele avalia ba tinan oin.

Iha monitorizasaun ne’e mós Ministra Dra. Florentina Smith hala’o inagurasaun ba projetu Uma Evakuasaun iha suku Lauisi, Munisípiu Aileu Vila. Aleinde ne’e, hala’o mós inagurasaun ba bee moos iha suku Aisirimou, aldeia Madabeno Munisípiu hanesan no inagura bee moos iha aldeia Karbulau, Suku Holarua Munisípiu Manufahi.

Entretantu, Olivio E. Dos Santos ofisiál Banku Mundial ba Timor-Leste, informa katak, Banku Mundial ne’ebé parseria ho Governu Timor-Leste iha komitmentu boot atu kontinua fó apoiu liuliu ba iha área dezastre naturais.

“Atu halo nusa ba oin, povu Timor-Leste bele moris iha komunidade ne’ebé rejilénsia husi dezastre naturais, tanba Timor mós iha área ne’ebé afeta ba dezastre naturais barak,” dehan Santos.

Projetu korredór estrada Dili-Ainaro, financia hosi fundus dezenvolvimentu nasaun sub-dezenvovidu no implementa husi Ministériu Solidariedade Sosiál ho liña ministeriais hanesan MAE, MAP no MDpHOA ho apoiu husi UNDP no Banku Mundial.

Partisipa iha monitorizasaun  ne’e, Vise-Ministru MAP, reprezentante MAE, reprezentante UNDP, ofisiál Banku Mundial, Plan Internasional no autoridades Munisípais sira hotu.