MINISTRA MSS REALIZA REUNIAUN HO FUNSIONÁRIUS ...

Dep. Media 23 January, 2018 

Ministra Solidariedade Sosiál, Dra. Florentina da Conceição Pereira Martins Smith, realize reuniaun ho funsionárius Centru Solidariedade Sosiál Munisípiu Ainaro iha loron Tersa (23/1/ 2018) no iha Sentru Solidariedade Sosiál Munisípiu Manufahi loron Kinta (25/1/20180, hodi ko’alia kona-ba forsa traballu ne’ebé  mak Sentru sira hasoru.

Iha enkontru ne’e funsionáriu sira husu ba Ministra atu toma konsiderasaun kona-ba promosaun kareira ba sira nomós fó formasaun ba funsionárius, tantu  iha rai laran ka rai liur. Hatan ba ida ne’e Ministra hatan, iha ona desizaun kona-ba promosaun ba kareira funsionáriu públiku nian ne’e, la’o tia ona, persiza deit atu iha desiminasaun informasaun para funsionárius bele hatene sira nia direitu no dever, ho nune’e sira bele hala’o servisu ho diak liutan.

Problema seluk ne’ebé mak CSS infrenta mak pagamentu ba idozus no inválidus, bolsa mãe no asuntus veteranus ne’ebé mak rejistu ona iha 2009, maibé to’o oras ne’e sira nia naran seidauk sai.

Ministra informa liutan, pagamentu subsídiu idozus no  inválidus no bolsa mãe sai kestaun fundamnetál ida. “Objetivu prinsipál ida ne’e mak ha’u hakarak atu hatene no intende didiak, tanba sá mak pagamentu subsídiu idozuz, inválidus no bolsa mãe ne’e atrazu,”  dehan Ministra. Ho kestaun hirak ne’e, mak Ministra MSS halo ona vizita kuaze Munisípius 11, hodi identifika kauza hosi atrazu ne’ebé akontese. Pagamentu subsídiu ba idozus no invalides, tenik Ministra, tuir lolos selu ona iha fulan Dezembru 2017, hodi sira bele uza osan ne’e iha loron natál, maibé sistema ka programa pagamentu ne’ebé mak estabelese hosi banku BNCTL ne’e demora la halimar.Tanba ne’e, hatutan Ministra, nia iha ona hanoin atu halo reuniaun ida ho sukursál BNCTL nian hodi haree problema ne’e iha ne’ebé.

Relasiona asuntus veteranus nian tanba saida mak to’o agora seidauk halo validasaun ba dadus 2009 nian, Ministra saliente, Sekretariu Estadu Asuntus Veteranu iha ona planu atu hala’o konferénsia ida atu termina hodi taka ona dadus 2003 nian, ho nune’e Komisaun Omenajen bele hahú ona valida dadus 2009.

Seluk hosi ne’e, Ministra mós hala’o vizita ba instituisaun solidariedade sosiál, hanesan Sentru Lorosa’e  iha Suku Holarua-Munisípiu Manufahi, vizita orfanatu Maria Virgen iha suku Letefoho no Ossuáriu iha suku Daisua-Munisípiu hanesan.

Vizita ida nee akompaña hosi Diretór Jerál Korporativus, Rui M. Gago Exposto, Diretór Nasionál Dezenvolvimentu Sosiál, Florencio Pina Dias Gonsaga, Diretór Nasionál Jestaun Risku Dezastre, Agustinho Cosme Belo no funsionárius Munisípiu 2 refere.