FAMÍLIA 56 HETAN APOIU EMERJÉNSIA HOSI MSS

Dep. Media 01 February, 2018 

Iha semana ne’e, anin boot ne’ebé akontese kuaze iha teritóriu timor laran tomak no rezulta sobu komunidade sira nia uma, ho nune’e, Ministériu Solidariedade Sosiál-MSS, Diresaun Risku Dezastre Naturais,  liu hosi Sentru Solidariedade Sosiál Munisípiu Liquiça-SSSML, fó ona apoiu sasan emerjénsia ba uma kain 56 ne’ebé konsidera hanesan vítima dezastres naturais iha Munísipiu Liquiça, kompostu hosi, Postu Administrativu Maubara, Bazartete no Liquiça Vila, iha Loron, Kinta-Feira, (01/02/2018).

Diretór Interinu SSSML, hanesan mós Kordenadór Asaun Jestaun Risku Dezastres no Asaun Sosiál, Abel de Sousa hateten, tipu dezastres ne’ebé akontese mak anin boot no udan ne’ebé rezulta hodi sobu komunidade sira nia uma i agora dadaun parte SSSML ho ekipa tomak hala’o ona verifikasaun ba uma komunidade ne’ebé mak hetan estragus no ekipa konsege identifika uma kain hamutuk 56 i distribui ona sasan emerjénsia ba vítima sira no sei kontinua nafatin identifika hodi fó apoiu ba sira ne’ebé seidauk hetan. Uma kain hirak ne’e, kompostu hosi Postu Administrativu Maubara, Bazartete no Postu Administrativu Liquiça Vila.

Apoiu emerjénsia ne’ebé mak MSS fó mak hanesan Fos, Biti, Supermi, Sanan, Mina Bimoli, Sardina, Lona nsst. Apoiu hirak ne’e oferese hafoin hetan verifikasaun hosi ekipa konjuntu.

Fase tuir mai, MSS nafatin hala’o assessment hodi identifika uma ne’ebé hetan estragus hosi dezastres naturais no sei apoiu material konstrusaun ba família vítima sira tuir kategória estragus ne’ebé iha, dehan Diretór Interinu SSSML.

Iha fatin akontesimentu, Administradór Postu Administrativu Maubara, Domingos Alves Correia hateten, haree ba tipu dezastre ne’ebé akontese hanesan anin boot no udan rezulta ai hanehan uma, rai monu inklui ahi han uma komunidade balun. Dehan Administradór, atu atende ba vítima dezastre ne’ebé mak akontese, iha liña kordenasaun interministériais servisu munisípais nian ne’ebé la’o di’ak tebes no agora dadaun ekipa sempre la’o haree hodi  halo verifikasaun ba uma komunidade sira ne’ebé hetan estragus i hosi parte Ministériu Solidariedade Sosiál-MSS halo ona apoiu emerjénsia ba vítima dezastre. hanesan Administradór sei kontinua koordena no ko’alia nafatin ho MSS atu haree material konstrusaun ba uma komunidade sira ne’ebé mak hetan estragus.

Entertantu, Vítima Dezastre, Carmelita Pereira hateten, “hau hanesan vítima dezastre senti triste tebes, maibé ho apoiu hosi Governu, liu hosi MSS ne’ebé mak ohin fó ona ajuda ba ami familia ida ne’e, ami  agradese no ami senti kontente i apoiu ida ne’e mós bele hakman netik difikuldade ne’ebé mak ami hasoru”.