PREPARASAUN BA SELEBRASAUN LORON VETERANUS

Dep. Media 26 February, 2018 

Relasiona ho preparasaun ba selebrasaun loron Veteranus ba dahuluk nian, Sekretáriu Estadu Asuntus Veteranus, Sr. Andre da Costa Belo “L4” hateten, iha selebrasaun loron veteranus nian, ne’ebé monu iha dia 03 Marsu 2018, sei konvida reprezentante veteranus sira hosi Munisipius hotu-hotu, Veteranus hosi nasoins viziñus, nomós nasaun ne’ebé fó apoiu durante funu nia laran, organizasoins sira, Universidade, tanba ne’e husu ba komunidade Veternus sira iha Timor-Leste, ho kontente hodi selebra loron veteranus ida ne’e. Sei iha mós palestra ne’ebé sei kóalia rasik hosi lider istóriku sira, liu-liu ko’alia kona-ba istória funu no futuru ba komunidade veteranus nian iha Timor-Leste. SE. Asuntus Veteranus kasu lia ne’e interview eskluzivu ho Radio Televizaun Timor-Leste, ne’ebé hala’o iha edifisiu sentrál MSS Kaikoli-Díli, loron Segunda Feira (26/02/2018).

Iha entrevista ne’e, Sekretáriu Estadu Veteranus, Sr. Andre da Costa Belo “L4” hateten, Wainhira diside hili no komemora loron nasionál ida, sempre mós mai hosi istória ida, istória ne’e mai hosi funu ne’ebé ita hahú hosi 1975 hodi hasoru invazór estrajeiru.

Sekretáriu Estadu ne’e hatutan, durante funu nia laran, kuaze baze apoiu ne’ebé ejiste iha Timor-Leste rahun, maibé depois ida ne’e, konsege reorganiza fali hosi dia 01 to’o dia 03 Marsu 1984, tanba ne’e, iha konferénsia veteranus ne’ebé hala’o iha Centru Convensaun Dili-CCD, halo aklamasaun ida hodi hili dia 3 Marsu hanesan loron reorganizasaun ba rezisténsia forsa armada hodi hasoru invazór estranjeiru, nune’e loron ida ne’e sai hanesan loron boot ba komunidade veteranus sira iha Timor-Leste.