MSS HO UNICEF ASINA PAA BA TINAN 2018-2019

Dep. Media 27 February, 2018 

Ministériu Solidariedade Sosiál-MSS, liu hosi Diresaun Nasionál Dezenvolvimentu Sosiál-DNDS hamutuk ho Parseiru United Nations Childrens Fund-UNICEF hala’o serimónia asinatura Planu Asaun Anual-PAA ba Tinan 2018-2019, ne’ebé asina hosi Ministra Solidariedade Sosiál, Sra. Florentina Smith no Reprezentante UNICEF iha Timor-Leste, Sra. Valérie Taton. Seremónia refere halaó iha sala enkontru Edifísiu Sentrál MSS Kaikoli-Dili, Loron Tersa-Feira, (27/02/2018).

Iha asinatura ne’e, Ministra Solidariedade Sosiál, Sra. Florentina Smith hateten, komprimisiu ida ne’e la’ós sai deit iha selebrasaun asinatura dokumentus, maibé Ministra hakarak akompaña lalaok sira ne’e to’o hetan nia objetivu ne’ebé mak di’ak ba povu, liu-liu ba labarik sira ne’ebé hein hela apoiu ruma hosi parseiru UNICEF atu bele ajuda sira.

Entertantu, Reprezentante UNICEF iha Timor-Leste, Valérie Taton hateten, planu servisu tinan 2018-2019 refleta importánsia hosi kontinuasaun konsolidasaun inisiativa sira ne’ebé halo hela dadaun, nomós hodi rezolve nesesidade programa sira iha futuru. Iha periódu tinan rua nia laran, tenik Taton, esforsu hotu sei halo hodi apoiu implementasaun pólitika bem estar labarik no família, dezenvolvimentu kapasidade bem estar sosiál no intensifika servisu ba aprovasaun lei protesaun labarik, justisa juvenile no lei adopsaun.

Partisipa iha seremónia refere, Diretór Jerál asuntus veteranus no protesaun sosiál, Eugénio João A. de M Soares, Diretór Nasionál Dezenvolvimentu Sosiál-DNDS, Florençio Pina Dias Gonzaga, Diretór Nasionál Planu Finansas, Aprovizionamentu no Lojístika-DNPFAL, Lucas Tois, Diretóra Nasionál Administrasaun no Rekursus Humanus, Rosalia Paixão, inklui Xefes Departamentu sira.