SEREMÓNIA FÚNEBRE SAUDOSU NATALINO SOARES “RAI ...

Dep. Media 04 April, 2018 

Bazeia ba dekretu Presidente Repúblika No. 9/2018, 04 Abril, Estadu Timor-Leste rekonhese no fó hómenagem ikus ba lutadór Saudosu Natalino Soares ne’ebé mate iha Hospital Guido Valadares iha Loron 31 Fulan Marsu 2018, hodi halot mate isin iha Jardim Herois Munisipíu Liquiça, ne’ebé ho marsa Militar kompostu hosi F-FDTL no PNTL. Seremónia refere hala’o iha loron Kuarta-Feira, (04/04/2018).

Matebian moris iha Aldeia Terlau, Suco Ulmera, Postu Bazartete iha loron 16 Fulan Setembru

Tinan 1952. Oan hosi aman Lequi Aço no Inan Lou Paul, sira hamutuk oan nain 7 (mane 3 no feto 4) matebian hanesan oan daha’at hosi maun alin nain 7.

Partisipasaun púlitika ba libertasaun pátria, iha tinan 1974 to’o 1975 saudosu hahu partilha iha luta libertasaun liu hosi organizasaun UNETIM (Uniaun Nasionál Estudantes Timorenses) ne’ebé fó apoiu ba Partidu ASDT/Fretilin, saudoso kontinua involve iha OPJT (Organizasaun Popular Juventude Timorenses), saudosu sai mós hanesan Guerilheiru Falintil no asumi kargu nudar Kordenadór Seksaun ba programa alfabetizasaun iha baze apoiu.

Iha tinan 1975 to’o 1977 saudosu hanesan delegado povoasaun, hosi loron 1 fulan Janeiru tinan 1979 to’o Loron 4 fulan Marsu 1979 saudosu  asumi kargu nudar Assistente Zona. Iha loron 26 fulan Novembru tinan 1984 to’o loron 31 fulan Dezembru tinan 1986 saudosu involve iha Frente Klandestina-CRRN, Iha tinan 1987 to’o 1997 iha faze CNRM saudosu nudar Sekretáriu Zona Nicolau Lobato no iha tinan 1998 to’o 1999 saudosu nudar Sekretáriu Zona Nicolau Lobato-CNRT.

Tempu resisténsia saudosu mós sempre hetan detensaun preventiva iha Korem Liquiça no Dili hosi tinan 1979, 1980, 1984, 1997.

Iha faze ukun-an, saudosu nudar membru komisaun konsulta públiku konstituisaun RDTL nian, depois desolusaun CNRT saudosu kontinua asumi kargu nudar Sekretáriu Asosiasaun Veteranus Resistênsia-AVR Postu Administrativu Bazartete, nudar Membru Komisaun  Akompanhamento ba Prossesu Politiku, Coordenadór CAQR (Comição de Acolhamento de Quadros da Resistência) Postu Administrativu Bazartete hahu hosi tempu UNAMET.

Iha tinan 2002 saudosu hahu hikas ninia involvimentu iha Partidu Politiku, nudar Kordenadór Komisaun Politika Fretilin Postu Administrativu Bazartete, iha tinan 2001 to’o 2007. Asumi kargu nudar Membru Komisaun Politika Fretilin Munisípiu Liquiça husi tinan 2007 to’o 2012, membru Komisaun Juridisaun Fretilin Munusípiu Liquiça iha tinan 2012 to’o saudosu hakotu nia i’is. Durante iha tempu ukun-an ne’e saudosu servisu nudar funsionáriu Públiku nudar OGL (Oficial do Governu Local) iha Postu Administrativu Bazartete hahu hosi tinan 2003. Ho luta naruk ne’ebé nia halo no kontribui ba Nasaun RDTL, ikus mai Estadu konsidera no rekonhese hodi fó honra ba saudosu liu hosi seremónia fúnebre iha Jardim dos Herois Munisípiu Liquiça.

Partisipa iha seremónia fúnebre ne’e mak hanesan, Vise Ministru Saúde, Luis Lobato, Vise Komisaun Permanente Parlamentu Nasionál, Júlio Sarmento “Meta Malik”, Administradór Munisípio Liquiça, PNTL, F-FDTL, Veteranus, Instituisoins Estadu, Organizasoins, Família Saudosu inklui Komunidades.