APRESENTASAUN REZULTADU DIAGNÓSTIKA NASIONÁL BA MSS

Dep. Media 12 April, 2018 

Ministériu Dezenvolvimentu no Reforma Institusionál hala’o apresentasaun rezultadu diagnóstika nasionál ba Ministériu Solidariedade Sosiál-MSS, ne’ebé hala’o ona iha V Governu Konstitusionál, objetivu diagnóstika ne’e mak atu bele hatene Ministériu nia progresu servisu, dezafius no oinsá bele hadia di’ak liu tan servisu Ministériu nian iha futuru. Apresentasaun rezultadu diagnóstika refere hala’o iha Sala Enkontru Edifísiu Sentral MSS Kaikoli-Dili, Loron Kinta-Feira, (12/04/2018).

Ministra Solidariedade Sosiál, Sra. Florentina Smith hateten, Rezultadu diagnóstika ne’e atu halo avaliasaun ida nune’e bele hatene to’o ona iha ne’ebé MSS ninia papel, hodi bele hatene mós pontos forte no pontos fraku MSS nian, hanesan Ministériu boot buka nafatin atu bele kompleta i diagnóstika ida ne’e bele azuda atu MSS ba futuru bele hadia di’ak liu tan ninia púlitika, programa ne’ebé mak persiza duni lori no hadia ba iha futuru.

Ministra akresenta liu tan, Diagnóstika ne’ebé halo, liu-liu ba área administrasaun, atendimentu públiku inklui ejekusaun orsamentu MSS nian, tamba ne’e pontos fraku ne’ebé hetan hosi diagnóstika ne’e MSS simu nune’e ba futuru tenke hadia. Hanesan membru governu simu ho realidade no buka atu intere di’ak liu tan ba  rekomendasoins ne’ebé iha atu nune’e ministériu bele implementa iha futuru.

Entertantu, Jestór Prinsipal ba Ministériu Dezenvolvimentu no Reforma Institusionál, Francisco Borolaco hateten, Sekretáriu Estadu Fortalesimentu Institusionál hala’o ona prosesu diagnóstika iha V Governu konstitusionál i ohin mai atu apresenta rezultadu ba MSS atu ministériu bele hatene ninia situasaun. Iha implementasaun servisu, MSS iha progresu barak maibé iha mós dezafius barak, Ministériu tenke haree fali ba jestaun rekursus humanus atu bele tau ema iha ninia fatin lolos para depois bele servisu ho kualidade no konsentra duni ba planu estratéjiku hodi nune’e ita bele sukat ona produktividade ne’e bele mosu, liu-liu oinsá bele atinji metas ba planu estratéjiku 2030, dehan Borolaco.

Partisipa iha apresentasaun rezultadu diagnóstika ne’e mak hanesan, S.E. Veteranus, Sr. Andre Da Costa Belo “L4”, Diretóres Jerais, Diretóres Nasionais, Diretóres Munisipais inklui Xefes Departamentu.