MSS SELEBRA ASINA AKORDU HO ISS 27

Dep. Media 23 April, 2018 

Ministériu Solidariedade Sosiál-MSS, liu hosi Diresaun Nasionál Dezenvolvimentu Sosiál-DNDS hala’o asina akordu ho Instituisaun Solidariedade Sosiál-ISS hamutuk 27 ne’ebé sai ona hanesan parseirus MSS hodi bele hatutan no implementa nafatin servisu MSS nian, seremónia asina akordu ne’e hala’o iha sala enkontru Edifísiu Sentral MSS-Kaikoli-Dili, Loron Segunda-Feira, (23/04/2018).

Iha oportunidade ne’e, Ministra Solidariedade Sosiál, Sra. Florentina Smith hateten, akordu ida ne’e hala’o tamba durante ne’e instituisaun hirak ne’e iha ona koperasaun servisu hamutuk ho MSS, atu bele hatutan nafatin servisu ministériu nian. Tuir Ministra, instituisaun hirak ne’e hala’o sira nia servisu ho di’ak no hetan progresu i hatudu rezultadu ne’ebé mak di’ak tebes, MSS garante no asegura nafatin funsionamentu instituisoins sira nian, tamba sira mós hala’o kna’ar importante ba funsaun ne’ebé MSS hala’o, hodi bele fó moris di’ak ba maluk sira ne’ebé mak persiza ajuda.

 

Ministra realsa liu tan, Akordu ida ne’e iha kontinuasaun ho orsamentu tinan 2017 ne’ebé kontinua ho orsamentu duodésimu, orsamentu ne’ebé mak atribui ba instituisaun hirak ne’e depende ba sira nia programa no proposta ne’ebé sira submete. Total orsamentu ba fulan Abril hamutuk 128 mil ne’ebé mak alokadu.

 

Entertantu, Diretór Exekutivu ba Asosiasaun Halibur Defisiensia Matan Timor-Leste, Gaspar Afonso hateten, “orsamentu ida ne’e bele reforsa ami liu tan atu bele fó apoiu no fasilita ba implementasaun programas no atividades ne’ebé ami trasa ona. Atividades ba asosiasaun Halibur Defisiensia Matan Timor-Leste nian mak hanesan, kursu ba língua Portugues, treinamentu lideransa, sosializasaun ba lei konvensaun direitu ba ema ho defisiénsia, nsst”.