MSS HO TLM-TL REALIZA ASSINA MEMORANDU ENTENDIMENTU

Dep. Media 08 May, 2018 

Ministériu Solidariedade Sosiál-MSS, liu hosi Diresaun Nasionál Assiténsia Sosiál-DNAS hala’o serimónia assina memorandu entendimentu ho The Leprosy Mission Timor-Leste(TLM-TL) hodi fó assisténsia ba ema ho defisiénsia inklui ema ho moras lepra. Assina akordu ne’e ba darua, ne’ebé halo tinan lima dala ida, Seremónia refere hala’o iha Edifísiu Sentral MSS, Kaikoli-Dili, Loron Tersa-Feira, (08/05/2018).

Diretór Jerál MSS ba Protesaun sosiál no Asuntus Veteranus, Eugénio João Amado de Maria Soares hateten, akordu ida ne’e hala’o atu MSS ho TLM-TL bele servisu hamutuk hodi fó assisténsia ba ema sira ne’ebé mak hetan moras lepra iha Timor-Leste inklui rehabilitasaun ba iha komunidade baze, liu-liu ba ema ho defisiensia hodi promove inklusaun sosiál ba grupus benefisiárius no fó promosaun ba vida sosiál katak, vida ida ne’ebé ho dignidade no fó moris di’ak ba ema sira ne’ebé sedauk iha assisténsia hosi governu iha Munisípius sanulu resin rua inklui zona ekonómia espesiál Oecusse.

Tuir Diretór Jerál katak, durante tinan lima nia laran TLM-TL hatudu ona rezultadu servisu ne’ebé mak di’ak, maibé husu atu aumenta tan volume servisu hodi fó asisténsia ne’ebé másimu nune’e bele fó moris di’ak liu tan ba ema ho moras lepra.

Entertantu, Country Director TLM-TL, Afliana Reis hateten, objetivu hosi assina akordu ne’e mak oinsá MSS ho TLM-TL bele kontinua servisu hamutuk iha área rehabilitasaun ba iha komunidade baze no  fó assisténsia ba ema sira ne’ebé mak hetan moras lepra, servisu ida ne’e foku liu ba ema ho defisiénsia no ema kbi’it la’ek, liu-liu oinsá bele hasa’e konsiensia hosi komunidade kona-ba direitu ema ho defisiénsia nian, atu nune’e sira mós bele goza sira nia moris hanesan ho komunidade bai-bain i sira mós bele moris independente iha vida ekonómia, edukasaun nsst.

Tuir programa no planu ne’ebé mak iha TLM-TL sei kobre ba Munisipiu 12 inklui Oecusse, maibé agora dadaun sira foin implementa iha Munisípiu 7 mak hanesan Munisípiu Dili, Manatuto, Baucau, Viqueque, Oecusse, Bobonaro no Suai.

TLM-TL hetan fundus hosi Australian Aid (The Leprosy Mission Australia), ba projeitu ida ne’e rasik TLM-TL hetan $.100.000 kada tinan. Iha tinan 2017 sira identifika no atende ona 102 benefisiárius ba munisípiu 7 ne’ebé mensiona iha leten. Tuir dadaus katak munisípiu ne’ebé hetan moras lepra a’as liu mak Oecusse, Baucau no Dili, dehan Afliana.

Partisipa iha seremónia assina memorandu entendimentu ne’e mak hanesan, Diretór Nasionál Assiténsia Sosiál, Mateus da Silva, Xefe Departamentu Protesaun no Promosaun Direitus Defisiéntes, António Noronha, Xefe Departamentu Bolsa da Mãe, Florinda de Jesus Amaral.