SEREMÓNIA LANSAMENTU RELATÓRIO PROTESAUN SOSIÁL

Dep. Media 29 May, 2018 

Ministra Solidariedade Sosiál, Dra. Florentina Smith, hamutuk ho embaxadór Portugal iha Timor-Leste, representante Internasionál Labour Organization-ILO, Kordinadór UN inklui Diretores Nasionais hosi MSS no liña ministeriais, hala’o seremónia lansamentu Relatóriu Diálogo Nasionál Baseia ba Avaliasaun ne’ebé ho nia kontiudu desafius no rekomendasaun ba ekstensaun protesaun sosiál iha Timor-Leste. Seremónia refere hala’o iha Edifísiu Sentral MSS-Kaikoli-Dili, Loron Tersa-Feira, (29/05/2018).

Hafoin lansamentu, Ministra Solidariedade Sosiál, Dra. Florentina Smith hateten, ohin halo lansamentu livru importante ida, ne’ebé mak hakerek kona-ba dezafius no rekomendasoins ba ekstensaun protesaun sosiál iha Timor-Leste tomak, estudu ida ne’e halo ho durasaun tempu tinan rua nia laran, hahu hosi 2016 to’o 2018, ne’ebé ho esforsu tomak halo estudu ida klean hosi instituisoins governu nian hodi identifika dezafius ne’ebé iha protesaun sosiál ne’e rasik.

Ministra akresenta liu tan, Livru ne’e hanesan dalan ida atu bele haree ba oin saida mak ita atu bele hadia di’ak liu tan iha púlitika protesaun sosiál nian, liu-liu iha área edukasaun, sosiál, saúde nsst. Tuir Ministra katak, área bolsa da mãe, subsidiu idosos inválides área hirak ne’e ninia persentajen seidauk tuir ita nia hakarak i persiza hadia nafatin ninia kualidade.

Rekomendasoins ne’ebé mak iha sai ona referénsia ida ba governu tuir mai para atu bele hatene to’o iha ne’ebé, hodi bele hala’o púlitika protesaun sosiál ho efisiénsia no efikásia, dehan Ministra.