MSS NO MS HALO REVISAUN BA STANDAR OPERASIONAL ...

Dep. Media 04 June, 2018 

Ministériu Solidariedade Sosiál-MSS, Ministériu Saúde-MS no Instituisoins ne’ebé servisu iha área defisiénsia, hala’o revisaun ba matadalan ou Standar Operasional Prosedur (SOP) atu identifika ema ho defisiénsia sira no fasilita atestadu médiku hodi assesu ba subsidiu inválides, SOP refere kria liu hosi grupu traballu ne’ebé mak estabelese ona iha tinan 2010 ho objetivu atu hadia di’ak liu tan servisu atendimentu ba ema ho defisiénsia. Enkontru ne’e hala’o iha Edifísiu Sentral MSS-Kaikoli-Dili, Loron Segunda-Feira, (04/06/2018).

Iha oportunidade ne’e, Xefe Departamentu Doensas naun contaminosa, Dr. Federico Bosco A. Dos Santos hateten, objetivu hosi revisaun ne’e, hakarak aktualiza fila fali SOP no intervensaun sira ne’ebé durante ne’e ekipa hala’o atu nune’e bele kondis ho situasaun atual nian.

Servisu ne’ebé durante ne’e MSS no MS hala’o di’ak tebes, Maibé nafatin iha difikuldade no agora dadaun MS identifika dadauk kazu balun, tamba ne’e liña kordenasaun persiza atu aktualiza liu tan, atu nune’e pessoal saúde sira ne’ebé identifika ona ema ho defisiénsia sira bele hatene hodi enkaminha, karik nia persiza apoiu sosiál ruma bele enkaminha ba iha MSS, karik persiza reabilitasaun bele enkaminha ba Centro Nacional de Reabilitação ou karik nia moras mental bele ba Hospital Nasionál Guido Valadares no São João De Deus Laclubar, dehan Dr. Federico Bosco.

Nune’e mós, Xefe Departamentu Protesaun no Promosaun Direitus Defisientes, António Noronha hateten, wainhira MS identifika ema ho defisiénsia sira sempre enkaminha mai iha MSS atu akumula ba programa hirak ne’ebé mak MSS iha ona. Dehan Noronha, dala ruma la liu hosi prosesu SOP ne’ebé mak estabele ona, ema ne’ebé la ho defisiénsia hakarak koko atu sai defisiénsia, hodi bele assesu ba subsidiu ne’ebé mak iha.

Noronha realsa liu tan, komunidade baze sempre kestiona katak, balun ne’ebé la merese atu hetan, sira bele hetan fali no balun ne’ebé mak merese atu hetan la hetan fila fali, tamba la iha konsensia hosi ita nia komunidade i dala ruma mós família sira subar ita nia ema sira ho kondisaun defisiénsia no la fó informasaun ba iha sentru saúde inklui tékniku sosiál ne’ebé iha ona kada postu Administrativu sira i difisil atu akumula ba iha programa ne’ebé mak iha ona, tamba ne’e persiza aktualiza liu tan SOP ne’ebé mak kria ona atu bele halo atendimentu ne’ebé mak di’ak liu ba ema ho defisiénsia sira hodi sira mós bele hetan sira nia direitu i la iha diskriminasaun.