ATENDIMENTU BENEFISIÁRIUS IHA SSSMB

Atendimentu Sentru Solidariedade Sosiál Munisípiu Baucau-SSSMB durante VII Governu konstitusionál, liu-liu iha área Dezastres Naturais, Bolsa da Mãe, Idosos no Inválides, inklui Carru Funeráriu. Atu hatene servisu SSSMB, Média MSS hala’o ona intervista, iha loron Terça-Feira, (26/06/2018).

Iha intervista ho Presidente Autoridade Munisípiu Baucau, Sr. António Agosto Guterres hateten, prestasaun servisu hosi MSS iha nível munisípiu, liu liu hosi Sentru Solidariedade Sosiál munisípiu Baucau la’o di’ak, mesmu iha VII governu ida ne’e nia mandatu badak, maibé asegura nafatin prestasaun servisu ne’e ba iha komunidade nia le’et, liu-liu programa Idosos no Inválides, Bolsa da Mãe, Carru Funeráriu, dezastres naturais, asisténsia sosiál inklui atendimentu ne’ebé iha ligasaun ba servisu MSS la’o di’ak nafatin.

Iha asaun sosiál no jestaun dezastres naturais, bazeia ba dekretu lei númiru 3/2016, iha akordu interorgániku ne’ebé entrega servisu ba Autoridade munisípiu katak rekursus humanus limitadu ne’ebé ema ida deit mak jere diresaun asaun sosiál no diresaun jestaun dezastres naturais. Kona-ba dezastre naturais buat ne’ebé tutela ba Aturidade Munisípiu mak levantamentu dadus, distribuisaun sasan emerjénsia nian, kona-ba rekoperasaun sei tutela iha MSS. Rekoperasaun ba iha vítima sira iha tinan 2016 no 2017 seidauk hala’o, nune’e, husu ba VIII Governu atu oinsá bele asilera lalais prosesu atu fó apoiu ba vítima sira hodi bele hadia fila fali sira nia uma.

Kona-ba dadus, Iha governasaun VII governu, Munisipiu Baucau halo ona atendimentu ba 110 kaisoins ne’ebé ita fornese ona (Janeiru-Juñu), kona-ba deastres naturais mais ou menus 400 i tal ba apoiu emerjensia nian. Tipu dezastre mak hanesan anin no udan ne’ebé estraga komunidade sira nia uma no ekipa hala’o uluk verifikasasun i fó apoiu tuir estragus uma ne’ebé mak iha, dehan Presidente.

Benefisiáriu idososu, Alfredo da Costa, idade 70 anos, hosi Suco Buibau, Aldeia Builai hateten, subsidiu ne’ebé governu fó ne’e mínimu liu hodi bele atende sira nia nesesidade uma laran, kona-ba pagamentu nia senti seidauk la’o di’ak, tamba ne’e husu atu bele fasilita no hadia diak liu tan atu nune’e bele ajuda ferik katuas sira hodi bele simu sira nia direitu ou subsidiu ne’ebé mak iha. Nia mós husu ba VIII governu atu fó konsiderasaun ba ferik no katuas sira, tamba $. 30 ne’e ba ami oituan liu, karik bele hasa’e ba $. 50 para ami bele aguenta to’o fulan ida, osan ne’ebé mak sira simu uza hodi sosa hahan nomós nesesidades sira seluk.

Nune’e mós benefisiáriu Bolsa da Mãe, Maria Freitas, hosi Suco Buibau, Aldeia Builai hateten, Subsidiu ne’ebé mak governu fó nia sente kontente tebes tamba bele azuda ona nia hodi hola netik labarik sira nia nesesidades eskola nian, ho subsidiu ida ne’e mós nia oan nain 10 bele escola hotu. To’o agora nia simu ona dala ha’at (4), osan ne’ebé nia simu hodi sosa nesesidades labarik sira nian mak hanesan ropa, sapatu, lapizeira no kadernu.

Entertantu, benefisiáriu dezastres naturais, Celestina Coreia da Costa, hosi Suco Buibau, Aldeia Samalakuliba hateten, anin bo’ot ne’ebé akontese iha 2017 ne’ebé sobu nia uma, MSS fó ona apoiu emerjénsia no material konstrusaun mak hanesan kalen inklui osan maun de obra, simu deit kalen tamba ho rasaun estragus ne’ebé mak iha, ekipa verifikasun konsidera hanesan a’at kma’an, esplika Celestina.