BNCTL HALA’O PAGAMENTU BA BENEFISIÁRIUS IDOSOS NO …

Ekipa hala’o ona pagamentu fase primeiru ba benefisiárius Idosos no Inválides tinan 2019 nian iha Munisípiu Manufahi. Pagamentu refere hala’o hahu iha Loron 15 Jullu no sei remata iha Loron 06 Setembru 2019, dadaun ne’e ekipa BNCTL Banku Nasionál Comersío Timor-Leste (BNCTL) hamutuk ho Ministériu Solidariedade Sosiál no Inkluzaun-MSSI hala’o pagamentu iha Suku Daisua Postu Administrativu Same, Loron Segunda-Feira, (29/07/2019).

Dadus ba idosos no inválides iha munisípiu manufahi iha tinan 2019 mak hamutuk benefisiárius 6028 ho ninia orsamentu $. 1,078,980,00.

Iha pagamentu ne’e, Diretór Sentru Solidariedade Sosiál Munisípiu Manufahi-DSSSM, Jose Amaral Tilman hateten, Pagamentu idosos no inválides primeira fase iha munisípiu ida ne’e la’o di’ak no ekipa BNCTL hala’o ona semana rua nia laran, durante pagamentu iha duni problema balun, liu-liu kona-ba dadus benefisiárius ne’ebé mak mate ona tamba família matebian tenke trata dokumentus ho prosesu ida ne’ebé mak kompleksu tebes, maibé ho akordu foun ne’ebé MSSI ho BNCTL halo konsege redus ona problema balun, liu-liu sira ne’ebé mate iha tinan 2019 katak wainhira benefisiáriu ida mate fó ona kompetensia ba Xefe Suku sira hodi halo deklarasaun ida ba benefisiárius ne’ebé mak mate ona no hetan vistu hosi administradór postu atu bele hetan sira nia direitu.

Parte MSSI halo ona karta informasaun ida ba Xefe Suku no Xefe Aldeia sira atu bele identifika benefisiárius sira ne’ebé mak hetan problema, liu-liu ba dadus benefisiárius sira, hodi nune’e SSSMM bele haruka ba Institutu Nasionál Seguransa Sosiál-INSS atu bele halo verifikasaun nune’e bele hatene ninia problema ne’e iha ne’ebé hodi bele halo ajustamentu atu benefisiárius sira bele hetan sira nia direitu, esplika Diretór SSSMM.

Nune’e mós Jerente BNCTL Sukursal Same, Alcino Monteiro hateten, Pagamentu ba idosos no inválides primeira fase iha Munisípiu Manufahi ba tinan 2019 hahu iha dia 15 Jullu katak pagamentu hala’o tuir duni orientasaun ne’ebé mak MSSI hato’o mai iha BNCTL no pagamentu ne’e rasik sei termina iha dia 06 Setembru 2019.

Ba dadus ne’ebé mak MSSI submete ona ba banku BNCTL sei selu hotu iha pagamentu fase primeiru, maibé ba dadus sira ne’ebé mak sala sei halo verifikasaun lolos hodi hadia atu nune’e direitu ne’e bele monu duni ba nain sira nia liman.

Ba sira mak moras ou defisientes ne’ebé mak la’o labele BNCTL sei halo pagamentu direita ba sira nia uma, maibé iha akordu foun fó mós poder ba autoridade lokal atu halo deklarasaun suku ne’ebé hetan koñesimentu hosi administradór postu, família benefisiárius bele apresenta dokumentus legais sira ne’e ho ninia naran no kartaun eleitoral nune’e banku bele halo pagamentu, dehan Diretór BNCTL.

Entertantu, Xefe Suku Daisua, Amorin da Costa Sarmento Husu ba MSSI no Banku BNCTL atu bele hadia nafatin liña kordenasaun, liu-liu ba dadus, orariu no fatin pagamentu atu nune’e lider komunitária bele informa ba komunidade sira atu bele la’o tuir no bele asegura prosesu pagamentu ne’ebé mak la’o. Tuir Xefe Suku, Ho akordu foun ne’ebé MSSI halo ho BNCTL katak wainhira benefisiáriu ida mate família matebian halo deit deklarasaun hosi Xefe Suku no hetan koñesimentu hosi Administradór Postu, ne’e hafasil ona ba komunidade sira atu bele hetan sira nia direitu. Dehan Xefe Suku, atendimentu ba idosos no inválides sira ita labele halo kriteria barak liu, maibé deklarasaun hosi Xefe Suku bele sai ona dokumentu komprovativu atu ema ne’e bele hetan ona ninia direitu, tamba karik aban bainrua mak iha problema kona-ba ninia dadus hanesan Autoridade komunitária sei toma responsabiliza ba deklarasaun ne’ebé mak iha, Esplika Xefe Suku.

Benefisiáriu Domingos Sarmento hosi Suku Daisua ho idade 76 hato’o ninia sentimentu kontente tamba “MSSI no BNCTL bele halo ona atendimentu ba pagamentu Idosos no Inválides ho di’ak. Osan ne’ebé mak hau simu sei uza hodi sosa ba hau ninia nesesidade bazika rasik”.