CLN ENTREGA FO’OS 250 TONELADAS BA MSSI

Ministériu Solidariedade Sosiál no Inkluzaun-MSSI hetan fo’os 250 toneladas hosi Centro Lojístika Nasionál-CLN, fo’os hirak ne’e simbolikamente entrega hosi CLN ba Ministra Solidariedade Sosiál no Inkluzaun, Armanda Berta dos Santos no Vise-Ministra, Signi Verdial, iha Armajem Tibar-Munisípiu Liquiça, Loron Sexta-Feira, (24/08/2018).

Iha oportunidade ne’e, Ministra Solidariedade Sosiál, Armanda Berta dos Santos hateten, MSSI hato’o pedidu ba iha CLN hodi husu fo’os 250 toneladas atu bele atende nesesidades ba orfonatu sira, defisientes nomós dezastres naturais inklui pedidu ne’ebé hato’o hosi maluk kb’it la’ek sira atu MSSI bele atende dadauk ona iha tempu badak nia laran.

Entertantu, Presidente CLN, Augosto Junior Trindade hateten, CLN nia natureza agora dadaun transforma ona hanesan empresa públiku, ne’ebé sai hanesan liman ain governu nian, maibe nafatin desde uluk servisu hamutuk ho MSSI hodi atende ba orfonatu sira, kbi’it la’ek nomós dezastres naturais ne’ebé derepente akontese.

Dever CLN ninian mak garante nafatin stok para hodi fó apoiu sosiál sira henesan ne’e, iha parte seluk. “Ami hanoin katak iha fulan ha’at ne’e nia laran to’o dezembru ita nia stok la sufisiente ona, tanba ne’e ohin ami ko’alia ona ho Ministra para bele ajuda ami iha konsellu ministru karik bele hatete hodi husu hela para ami bele hetan tan 6000 toneladas para bele tau iha stok, tanba ita nia konsumu nasionál deit iha fulan ida kuaze 11 mil toneladas, tanba saida mak ami husu 6000 mil toneladas deit ho razaun katak, Centru Lojistika Nasionál la’os lor-loron halo intervensaun, maibé kuandu nesesidade iha komunidade derpente sa’e no presu derepente sa’e entaun ami halo intervensaun para normaliza presu, ida ne’e mak ami hanoin importante tebes”.

Iha futuru MSSI ho CLN tenke halo akordu no kontratu ida para atu hatene lolos serteza katak iha tinan ida MSSI ninia nesesidade ba fo’os ne’e tonelada hira para depois CLN bele halo kalkulasaun ida ho lolos para CLN periodikamente bele oferese ba MSSI, esplika Presidente CLN.

Partisipa iha atividade ne’e mak, Diretór Jéral Servisus Korporativus-MSSI, Rui Manuel Gago Exposto, Diretór Nasionál Asisténsia Sosiál, Mateus da Silva no Xefe Departementu Asisténsia Humanitaria, Diniz da Silva Buru Bara.

Comments Closed

Comments are closed. You will not be able to post a comment in this post.