VMSSI PARTISIPA SEMINÁRIU ORGANIZASAUN TJANPI

Vise-Ministra Solidariedade Sosiál no Inklusaun-VMSSI, Signi Chandrawati Verdial, partisipa iha semináriu grupu feto homan, ne’ebé realiza husi Organizasaun Tjanpi Australia, foin lalais ne’e iha Timor Plaza, Comoro-Dili, loron Tersa-Feira, (17/07/2018).

Iha oportunidade ne’e, Vise-Ministra, Signi, hato’o katak, eventu ne’e inportante teb-tebes tanba ita nia grupu feto sira ne’e, fahe sira nia esperiensia ba malu, husi australia bele fahe sira nia esperiensia mai ita, husi mós ita nia grupu feto timor rasik, sira mós fahe sira nia esperiensia uitoan, kona-ba oinsá grupu feto sira ne’ebé sira lidera hela atu hakbit ita nia ekonomia feto nian, liu husi atividades homan ne’ebé iha.

Liu husi eventu ida ne’e, Vise- Ministra, informa katak, husi VIII governu konstitusionál ita reafirma nafatin ita nia politika, katak ita sei suporta nafatin, oinsá atu hakbit ekonomia feto nian hahu husi VII governu mós ita iha ona organizasaun sira ne’ebé foka liu ba oinsá atu hakbi’it ekonomia feto sira nian, ita sei kontinua nafatin to’o agora. tanba ne’e maka MSSI, liu husi VIII governu iha planu atu loke banku dezenvolvementu nasionál ida hodi jere osan husi fundu seguransa sosiál, ne’e ba fila-fali mikro kredit ba povu kbi’it laek sira, no mós ba feto maluk sira, ne’ebé hala’o hela aktividade ekonomia ida ne’e, atu nune’e sira mós bele iha espasu hodi hola parte iha dezenvolvementu, katak Signi.

Kondisaun ne’ebé estadu atu kria maka politika bo’ot ida, oinsá banku ne’e bele hari’i lalais hodi bele jere investimentu hirak ne’e, ezemplu fundus veteranus ninian, seguransa sosiál, banku ne’e sei jere hodi bele dezenvolve fila-fali husi parte sosiál, informa Signi Chandrawati Verdial.

MSSI, durante ne’e fó suporta liu hosi Fundasaun ALOLA, suporta la bo’ot maibé husi politika ita presiza atu habelar fali ita nia koperasaun oinsá ita bele servisu hamutuk ho duadores sira, dehan Vise-Ministra.

“Ba feto-maluk sira ha’u nia hanoin labele lakon esperansa, iha dalan oin-oin ba ita nia feto maluk sira atu dezenvolve sira nia-an, inportante maka sira tenke kapasita sira nia-an hodi kompete, ha’u fiar katak ita nia governu fo espasu lubuk ida, liu-liu ba feto maluk sira atu hola parté iha dezenvolvimentu”, dehan Signi Verdial.

Partisipa iha semináriu ne’e mak hanesan, Grupu Feto Timor-Leste, Grupu Feto Homan Bazartete, Fundasaun ALOLA no FOKUPERS.

Comments Closed

Comments are closed. You will not be able to post a comment in this post.