MINISTRA MSSI OFISIALMENTE LOKE WORKSHOP IHA CNC

Ministra Solidariedade Sosiál no Inklusaun-MSSI, Armanda Berta dos Santos, ofisialmente loke workshop iha Centru Nasionál Chega-CNC ho tema “Hasae Koñesimentu kona-ba servisu apoiu Psiko-Sosiál iha Timor-Leste. Workshop refere hala’o iha fatin CAVR, Balide-Dili, Loron Kinta-Feira, (12/07/2018).

Iha abertura ne’e Ministra MSSI hato’o, agradese wain ba CNC ne’ebe konvida ha’u dahuluk ba oportunidade ida ne’e hodi partisipa mós iha abertura workshop kona-ba servisu Psiko-Sosiál iha Timor-Leste ne’ebé mós ba Politika Governu hodi hatan ba sobrévivente, vulneravel, konflitu pasadu no oinsa béle servisu hamutuk ba oin.

Ministra hatutan, servisu lubuk bo’ot ne’ebé hala’o ona husi Comissão de Acolhimento, Verdade e Reconciliação-CAVR no CNC maske Governu seidauk hala’o programa espesifiku ba sobrevivente ba konflitu pasadu maibe Governu tau nafatin atensaun liu husi Planu Estratejiku Nasionál ba oin hodi fó atensaun ba promosaun no kbi’it feto vitima husi pasadu no feto vulneravel sira.

Ministra realsa liu tan, MSSI hanesan Ministériu ida ne’ebé responsavel hodi kaer papel importante ba protesaun sosiál tuir konstituisaun RDTL artigu 56 no iha Lei Kontra Violénsia Doméstika mós fó hela knar bo’ot ida ba MSSI hanesan orgaun importante ba asegura rede protesaun sosiál ba ema vulneravel sira.

“Ministériu Solidariedade Sosiál no Inklusaun reforsa organizasaun parseira sira hodi apoiu ba implementasaun programa atu asegura sobrevivente ne’ebé vulneravel hotu-hotu iha direitu ba protesaun sosiál”, dehan Ministra.

Iha fatin hanesan Diretór Ezekutivu CNC, Hugo Fernandes hateten, primeiraves exselênsia Ministra Solidariedade Sosiál no Inkluzaun mai vizita iha Centru Nasionál Chega-CNC hodi lori exselênsia ba vizita fatin-fatin ne’ebé sai núdar edifisiu CNC nian, maibe mós fatin ne’ebe maka nakonu ho memoria ita Timor nian, no ha’u kontenti primeiru ho onra tebes exselênsia Ministra MSSI béle hi’it aan mai ofisialmente hodi loke mós workshop ida ne’e.

Diretór hateten liu tan, durante tinan 24 ita nia maluk sira ne’ebé maka mai iha ne’e núdar prizeneiru karik to’o agora moris iha situasaun traumatizadu entaun fatin ida ne’e lori fila-fali ita ba servisu ne’ebé maka CNC simu husi estadu no governu, servisu ne’ebé maka parseiru sira halo tiha ona hanesan servisu kona-ba saúde mentál nian, trauma no nesesidade atu kontinua hetan apoiu iha Timor-Leste.

Partisipa Iha workshop mak hanesan, Diretór Nasionál Asistênsia Sosiál-DNAS, Mateus da Silva, Xefe Departamentu Doensas Naun Contaminosa, Dr. Federico Bosco A. dos Santos, husi Ministériu Saude, Diretór Ezekutivu Fundasaun Klibur Domin, Joaquim Freitas Soares no Parseiru sira.

Comments Closed

Comments are closed. You will not be able to post a comment in this post.