SEREMÓNIA HASA’E BANDEIRA

Ministra Solidariedade Sosiál no Inklusaun-MSSI, Armanda Berta dos Santos, Diriji Seremónia hasa’e Bandeira ba dahuluk iha VIII Governu Konstitusionál, ne’ebé hala’o iha Resintu MSSI Kaikoli-Dili, Loron Segunda-Feira, (02/07/2018). Iha isar bandeira ne’e, partisipa hosi Diretores Jerais, Diretores Nasionais, Xefes Departamentu, Assesores Nasionais no Internasionais inklui Funsionárius MSS.

Iha diskursu ne’e Ministra MSSI hateten, Ohin loron dahuluk iha MSSI hodi lidera iha isar bandeira ida-ne’e, ha’u agradese ba funsionárius hotu-hotu nia partisipasaun. Ha’u fiar katak, partisipasaun ida-ne’e sei ativu nafatin tuir kalendáriu ne’ebé mensiona iha kada mensál.

Ministra hatutan, núdar ema politikamente hetan fiar husi oitavu (VIII) Governu Konstitusionál hodi mai lidera Ministériu Solidariedade Sosiál no Inkluzaun atu servisu ba povu doben Timor-Leste liu husi aréa Sosiál ho loloos no momoos, tanba povu ne’ebé moris iha Nasionál no Munisipál sira hotu hein hela ita nia atendementu sosiál ne’ebé digñu.

Ministra realsa liu tan, husu ba funsionárius tomak husi Nasionál to’o Munisipais katak, servisu no servisu, tanba ita mak aparrellu Estadu, durante mandatu ida ne’e sei la aseita atu iha indikasaun ruma relasaun ho Korupsaun, Koluzaun no Nepotizmu dentru de servisus.

“Relasaun ho servisus MSSI nian, ha’u fó korajen ba hotu-hotu katak, atendementu sosiál labele sees husi setór estratéjiku ne’ebé kontempla iha Planu Estratéjiku Dezemvolvimento Nasionál no kondisaun ne’ebé ha’u temi durante ida-ne’e, loos duni, ita bo’ot sira hala’o ona no agora ita kontiñua”, dehan Ministra.

Iha fatin hanesan Ministra hateten, wainhira ha’u haree no lee rezultadu diagnóstiku Nasionál ba fortalesementu Institusionál kona-ba relatóriu atividades auto avaliasaun ba MSSI indika, iha problema no dezafius lubuk mak iha Ministériu ida-ne’e infrenta. Tanba ne’e mak núdar Ministra ha’u husu ba diresoens jerais rua, inklui Inspetór Jerál atu haree didiak no hadiak liu tan mak opsaun di’ak hodi reforsa kontrolu internál.

Ikus liu Ministra hato’o, ba funsionárius hotu-hotu katak, tenke disiplina iha servisu fatin tuir lei funsaun públika mak hanesan, labele mai tarde, labele fila sedu, ida-ne’e tuir lei laloos ona. Entre kondisaun rua ne’ebé temi, konklui katak, tama tuir oras maibé lahalo servisu, tama servisu tarde maibé halo servisu, buat rua ne’e husu ba superiores Dirsoéns hodi fortifika kontrolu internál ho razoavel.

Comments Closed

Comments are closed. You will not be able to post a comment in this post.