SSSMB REALIZA ENKONTRU KOMUNITARIU

Ministériu Solidariedade Sosiál-MSS liu husi Sentru Solidariedade Sosiál Municipiu Bobonaro-SSSMB, estabelese nia papel atu halo atendimentu sosiál iha Municipiu hanesan ain no liman MSS nia iha baze ne’ebé realiza enkontru komunitariu ho objetivu atu hatene informasaun no servisu area sosiál nia iha komunidade nia le’et. Enkontru refere hala’o iha salaun enkontru Posto Administrativu Bobonaro, Loron Tersa-Feira, (19/06/2018).

Diretor SSSMB, Acácio Gonçalves hato’o, prosesu atendimentu sosiál ita servisu hamutuk ho lider komunitariu atu identifika benefisiariu sira ne’ebé maka priense ona kriteria atu foti dadus, liu-liu mak hanesan area Idosos-Invalidos, Bolsa da Mãe, Desastre Naturais, Veteranus, Asistensia Sosiál no area sosiál sira seluk.

Diretor hateten, enkontru SSSMB sempre fokus liu ba iha Posto Administrativu atu hatene informasaun no Ministériu aloka tekniku iha baze atu servisu hamutuk ho lider komunitariu hodi nune’e bele hala’o atendimentu diak no lalais ba ita nia benefisiariu sira.

Diretor hatutan, servisu sosiál hala’o prosesu atendimentu ba komunidade sempre iha difikuldade no tarde tanba sistema ne’ebé mak halo maibe apoiu husi MSS liu husi SSSMB lao kapas no diak teb-tebes.

Iha fatin hanesan, Administrador Posto Administrativu Bobonaro, Rui Maubere Barros hato’o katak, durante ne’e iha liña koordenasaun di’ak tebes ho SSSMB nian ne’ebé hala’o servisu atendimentu sosiais iha Municipiu Bobonaro. Funsionarius MSS Maliana sempre koordena ho parte lider lokál hodi hala’o atendimentu ba komunidade sira iha area sosiál no mós problemas hirak seluk.

“Atu hala’o atendimentu ba kazu ruma ne’ebé akontese, parte MSS la la’o mesak, ami sempre la’o hamutuk tanba sira hatene katak nu’udar lider lokál mak iha liu kuñesimentu ba populasaun sira,” dehan Rui.

Ikus liu, Xefe Suku Lourba, Luis Daitalo de Deus hateten, enkontru ne’e diak tebes, núdar lider komunitariu sira marka presenja atu rona no hatene kona-ba prosesu atendimentu servisu sosiál nia iha baze ne’ebé hetan difikuldade durante ne’e no ba oin bele hadia servisu durante lao tarde no difikuldade ne’ebé komunidade sira infrenta.

Partisipa iha enkontru mak, Sekretáriu Presidente Autoridade Municipiu Bobonaro, Julio Carvalho Caerro, Komadante Polisia Eskuadra Posto Administrativu Bobonaro, Aderito de Araujo, Representante F-FDTL, Xefes Suku 18 Posto Administrativu Bobonaro, Pontu Fokal SSSMB no Komunidade sira

Comments Closed

Comments are closed. You will not be able to post a comment in this post.