EKIPA AVALIASAUN HALA’O DISKUSAUN BA PROPOSTA ISS

Ministra Solidariedade Sosiál no Inkluzaun, Armanda Berta dos Santos hamutuk ho ekipa avaliasaun hala’o diskusaun kona-ba proposta hosi Instituisaun Solidariedade Sosiál-ISS ba tinan 2018 ho total 36 instituisoins kompostu hosi Uma Mahon, Defisientes, Prevensaun no orfonatu inklui Sentru Komunitária, ne’ebé apresenta ona ninia proposta mai iha MSSI, instituisoins hirak ne’e mak durante ne’e implementa no hatutan servisus Ministériu ninian. Enkontru refere hala’o iha Edifísiu MSSI Kaikoli- Díli, Loron Kuarta-Feira, (12/09/2018).

Iha oportunidade ne’e, Ministra Solidariedade Sosiál, Armanda Berta dos Santos hateten, enkontru ohin atu haree no halo diskusaun kona-ba proposta aplikasaun fundus instituisaun Solidariedade Sosiál-ISS hamutuk 36 instituisoin ne’ebé mak hatama ona sira nia proposta mai iha MSSI.

Ministra husu ba ISS sira tenke ezekuta orsamentu no programa tuir regras no lei ne’ebé mak iha, dehan Ministra, karik instituisaun la hala’o ezekusaun orsamentu no programa tuir regras no lei, MSSI sei hapara apoiu ne’ebé mak iha, tanba ne’e husu ba ekipa avaliadór atu bele servisu di’ak nafatin, liu-liu oinsá bele halo verifikasaun ho di’ak ba instituisaun solidariedade sosiál ne’ebé mak hatama ona sira nia proposta mai iha MSSI.

Entertantu, Diretór Nasionál Dezenvolvimentu Sosiál, Florencio Pina Dias Gonzaga hateten, orsamentu ne’ebé mak aprova ona iha tinan 2018 mak hamutuk $. 1, 300 miliaun. Maibé dadaun ne’e aplikante ne’ebé hatama proposal hamutuk 36 institusoins ho ninia orsamentu $. 1, 959, 425.10 miliaun, ne’e signifika katak plafond orsamentu ne’ebé mak iha sei la to’o, tanba ne’e MSSI sei halo avaliasaun detaillu ba proposal hirak ne’ebé mak iha no sei kontinua halo diskusaun ho ISS sira para bele haree orsamentu lolos. Ekipa mós sei kontinua halo diskusaun para konsidera pontus balun ne’ebé ita bele hamenus oituan hodi bele aguenta iha fulan ha’at nia laran para depois iha tinan 2019 ita bele asilera fila fali.

Pontus importantes ne’ebé hosi ekipa avaliasaun haree mak hanesan, programa no atividades, tempu atu ezekuta, programa no atividades ne’e tenke relevantes ho kna’ar ministériu ne’e ninian, haree mós ezekusaun orsamentu kada ISS nian iha tinan 2017 katak, sira nia ezekusaun programa no benefisiárius ne’ebé sira atende ne’e nia rezultadu to’o iha ne’ebé, hirak ne’e hotu sei sai referensia ba ekipa avaliasaun.

Ba tinan 2018, tanba hela deit fulan ha’at ona, entaun ekipa deside ona katak kapital minor no kapital dezenvolvimentu ita sei la apoiu, tanba buat hotu-hotu sei liu hosi tender no aprovisionamentu, maibé ita foku liu ba saláriu no bens servisu para mákina instituisaun ne’e bele la’o no ejiste nafatin no ita bele kontinua ba tinan 2019. esplika Diretór DNDS.

Partisipa iha enkontru ne’e mak, Representante hosi PDHJ, Komisaun Nasionál Direitus Labarik, FONGTIL, Unidade Apoiu Sosiedade Sivil (Gab. Primeiru Ministru), Gab. Inspesaun no Auditória MSSI.

This post is also available in: English