Governu Timor-Leste Hala’o Assina Akordu Ho Governu Australia

Assina akordu ida ne’e aprova faze segunda hosi programa Nabilan ne’ebé hahu ona iha tinan 2014 no iha objetivu hodi garante katak feto no labarik sira bele moris livre hosi violénsia no bele goza sira nia direitu. Tuir akordu ida ne’e, Nabilan sei kontinua to’o juñu 2022 ho investimentu hosi Governu Australia hamutuk Miliaun 35 Dolares Australia durante tinan ualu (2014-2022). Programa ne’e sei intensifika esforsu sira hodi apoia komunidade no instituisaun sira foti asaun hodi hamenus violénsia kontra feto no labarik sira iha Timor-Leste.

Hafoin assina akordu, Ministra Solidariedade Sosiál no Inkluzaun, Armanda Berta dos Santos hateten, ohin hala’o assina akordu subsidiáriu entre Governu Timor-Leste ho Governu Australia ba programa Nabilan. Ho apoiu Governu Australia bele fasilita Timor-Leste hodi halo prevensaun no redus problema violénsia ba feto no labarik. Programa ida ne’e jere hosi Asia Foundation, liu hosi parseria ho Ministériu Solidariedade Sosiál no Inkluzaun, Sekretária Estadu ba Igualdade no Inkluzaun no parseria sosiedade sivíl mak hanesan PRADET, Alfela, Fokupers, Uma mahon Salele, JSMP inklui Casa Vida.

Read also:
ENKONTRU PREPARASAUN BA ALERTA DEZASTRE NATURAIS

Iha fatin hanesan, Embaxadór Australia iha Timor-Leste, Peter Roberts hateten, koperasaun entre Governu Timor-Leste ho Governu Austalia hamutuk ho sosiedade sivil no parseru sira seluk atu hapara violénsia kontra feto no labarik.

Read also:
PRIZONEIRUS-BECORA SELEBRA NATAL HAMUTUK

Servisu ida ne’e importante tebes, tamba asuntu violénsia ba feto no labarik sai hanesan dezafius ba mundu tomak inklui Timor-Leste, tamba ne’e, importante tebes servisu hamutuk hodi suporta feto no labarik sira iha Timor-Leste, liu-liu oinsá bele hamenus no hapara violénsia kontra feto no labarik, dehan Peter.

Entertantu Sekretária Estadu ba Igualdade no Inkluzaun, Maria José da Fonseca Monteiro de Jesus esplika, assinatura akordu ohin hanesan pasu importante ida ba esforsu hamutuk ho ita nia parseirus dezenvolvimentu sira, liu-liu ho Governu Australia, hodi bele halo esforsu oin-oin nune’e bele halo prevensaun no kombate violénsia ba feto no labarik iha Timor-Leste.

Read also:
DNRK KAPASITA STAF IHA ÁREA ATUÁRIA BA SEGURANSA

Agora dadaun númeru dadus ne’ebé mak iha nafatin a’as, tamba ne’e mak Governu Australia haree ninia importansia no investe mós iha área ida ne’e hodi bele kompleta mós esforsu ne’ebé mak governu Timor-Leste rasik hala’o ona, katak Sekretária Estadu Igualdade no Inkluzaun.

Desde 2014, programa nia parseiru sira fornese ona servisu hanesan asisténsia legál, ezame médiku, akonsellamentu no alojamentu iha situasaun emerjénsia ba vítima ne’ebé hetan violénsia.

Comments Closed

Comments are closed. You will not be able to post a comment in this post.