MINISTRA MSSI ENTREGA APOIU HUMANITARIA BA …

Ministra Solidariedade Sosiál no Inkluzaun-MSSI, Armanda Berta dos Santos, akompaña husi Diretór Nasionál Asisténsia Sosiál-DNAS, Mateus da Silva, simbolikamente entrega apoiu humanitaria ba Komandante Labarik. Apoiu refere hala’o iha Aldeia Lemocari, Suku Manleuana, Postu Administrativu Dom Aleixo, Munisípiu Dili, Loron Sesta-Feira, (29/03/2019).

Iha oportunidade ne’e Ministra MSSI hato’o, ohin mai iha ne’e bazeia ba proposta ne’ebé mak iha ne’e mak hamutuk ho Diretór DNAS no tekniku sira tun direitamente haree ajuda humanitaria asisténsia sosiál ninian.

Ministra MSSI hatutan, apoiu asisténsia humanitaria ne’ebé fó mak hanesan fos saka 20 no Sanan 2 ba komandante labarik nia esposa ne’ebé foin dadauk husik hela mundu, ne’e mak bazeia ba proposta hanesan ajuda husi MSSI ba familia ne’ebé hetan susar.

Ministra hateten tan, apoiu ka ajuda humanitaria ne’e MSSI laos deit apoiu ba komadante labarik maibe sekarik ba ita nia komunidade sira ne’ebé maka husu ajuda husi MSSI sempre prontu atu ajuda tuir MSSI nia kbi’it ne’ebé mak iha no laos parte ba ida deit maibe ba 12 Munisipius iha hotu ona sentru solidariedade sosiál inklui Rejiaun Autónomia Espesiál Oe-Cusse Ambeno-RAEAO atu haree ba asuntu ida ne’e liu-liu atendimentu ba públiku no proposta ne’ebé ba governu katak governu sei la taka matan ba asisténsia sosiál ne’ebé mak iha liu husi ajuda humanitaria.

Iha fatin hanesan, Jose dos Santos “Komandante Labarik”, hateten, bazeia ba proposta husu ajuda ba governu besik fulan ida, ne’e mak ohin loron bele hetan ona ajuda husi MSSI no husi familia tomak hato’o obrigada ba Ministra MSSI ohin loron bele hakat mai iha ne’e entrega apoiu humanitaria.

Partisipa iha atividade mak hanesan, Xefe Gabinete Ministra MSSI, Xefe Departamentu Asisténsia Humanitaria DNAS, Diniz da Silva Buru Bara, Familia Komandante Labarik no Funsionáriu MSSI sira.

Comments Closed

Comments are closed. You will not be able to post a comment in this post.