Mtsss Portugal Visita ISS Manatuto No Baucau

Vise-Ministra Solidariedade Sosiál no Inkluzaun-MSSI, Signi Verdial, direitamente simu delegasaun Portugal ka representante Ministru Traballu Solidariedade Seguransa Sosiál-MTSSS Portugal, Cláudia Joaquim ba visita Instituisaun Solidariedade Sosiál-ISS, hanesan Centro Social da Paz-Santa Isabel Manatuto no Centro de Dia São José Baucau. Visita refere hala’o iha Munisipiu Manatuto no Baucau, iha loron Kinta-Feira, (11/04/2019).

Iha biban ne’e, Vise-Ministra MSSI hateten, ohin mai akompaña representante Ministru MTSSS Portugal nia mai visita Timor-Leste hanesan parseiru ho Portugal ne’ebé tau finansiamentu servisu no ekipamentu sira ne’ebé ajuda atu redus pureza iha komunidade nia le’et no aproveita oportunidade ida ne’e Portugal mai haree visita situasaun ne’ebé los saida mak ita persija harii no halo avaliasaun ba programa pasadu no mesmu tempu haree fali programa kooperasaun foun ne’ebé ita sei asina iha loron tersa, 16-04-2019 entre Timor-Leste ho Portugal durasaun tinan 4 hahu husi 2019 to’o 2023.

Read also:
MINISTRA HALA’O ENKONTRU HO EMBAIXADORA NOVA

“Ita iha tinan-tinan iha komitmentu katak Ministériu tau orsamentu 70% husi ekipamentus sira hotu no ita nia parseiru Portugal tau orsamentu 30% iha parseira sira ne’e hotu”, dehan Vise-Ministra.

Vise-Ministra MSSI hateten tan, ba futuru ita persija tan suporta iha finanseiru ba sentru no sira iha limitasaun teb-tebes ba sira nia atividade entaun perkupasaun ne’ebé sira hato’o liu husi finanseiru ne’e iha oportunidade liu husi ita nia parseiru no duadores haree rasik situasaun real karik ba oin persija reforsa tan finanseiru no mesmu tempu halo kapasitasaun ba funsionáriu sira direita haree husi ita nia parseiru sira.

Read also:
MSSI Hala’o Konsultasaun Pan Ba Ema Ho Defisiénsia Iha Rejionál Baucau

Iha loron hanesan, representante Ministru MTSSS Portugal, Cláudia Joaquim hato’o, programa kooperasaun sei asina iha loron tersa feira oin mai, programa ne’e aprovadu iha Portugal husi Ministériu no iha Timor-Leste aprovadu husi Konsellu Ministrus.

Representante Ministru MTSSS hatutan, programa ne’ebé nia objetivu prinsipal núdar kontinuidade ba servisus parseria ho governu Timor-Leste nune’e ita bele konsege hetan rekursus finanseirus no rekursus umanus ne’ebé mai husi Portugal bele sai potensiadu liu atu nune’e bele apoiu tan projetu seluk.

Representante Ministru MTSSS realsa liu tan, programa ida ne’e importante teb-tebes no programa ne’e sei lao to’o tinan 2023 kontinua apoiu nafatin projetu sira ne’ebé iha no indentifika tan projetu seluk no loron hirak ne’e mai visita iha Timor-Leste atu haree projetu kooperasaun nia ne’ebé Portugal ho Timor-Leste halo.

Read also:
ENKONTRU BILATERAL ENTRE MTSSS PORTUGAL HO MSSI ...

Representante Ministru MTSSS hato’o tan katak, iha Ministériu Seguransa Sosiál Timor-Leste importante atu hatene knar ne’eb’e irmás sira halo ba labarik no idosos sira.

Ikus liu Cláudia hateten, loron hirak tuir mai ne’e sei iha reuniaun ho membru governu sira no iha konferénsia kona-ba seguransa sosiál no lalaok projetu kooperasaun ne’ebé uluk hahu husi tinan 2003-2004 nian.

Akompaña iha visita mak hanesan, Embaixadór Portugal iha Timor-Leste, José Pedro Machado Vieira, Diretór Jeral Protesaun Sosiál MSSI, Eugénio João Amado de Maria Soares, Diretores Nasionais, Diretores Munisipius no Xefes Departamentus MSSI.

Comments Closed

Comments are closed. You will not be able to post a comment in this post.