Lansamentu Permeira Pedra Ba Konstrusaun Sentru …

Representante Ministru Traballu Solidariedade Seguransa Sosiál-MTSSS Portugal, Cláudia Joaquim hamutuk ho Ministra Solidariedade Sosiál no Inkluzaun Timor-Leste, Armanda Berta dos Santos hala’o lansamentu primeira pedra ba konstrusaun sentru lorosa’e ne’ebé hari’i hosi madre sira iha munisípu Manufahi, Postu Administrativu Same, Suku Hola-Rua, seremónia refere hala’o iha loron Sábadu, (13/04/2019).

Iha oportunidade ne’e, Ministra Solidariedade Sosiál no Inkluzaun, Armanda Berta dos Santos hateten, Sentru ida ne’e importante teb-tebes, atu bele fó edukasaun ba ita nia oan sira, tamba ne’e ba oin ita sei servisu hamutuk ho Portugal, hodi nafatin halo kooperasaun ne’ebé mak di’ak atu fó apoiu ba sentru ida ne’e rasik. Dehan Ministra, Timor-Leste mak sei haree 70% no Portugal mak 30% hodi apoiu ba sentru ida ne’e nia atividades tomak.

Ministra fó Agradese mós ba madre sira hotu ne’ebé mak durante ne’e didika-an tomak hodi bele eduka labarik sira no agradese mós ba Governu Portugal ne’ebé fó ona apoiu ba ita Timor-Leste no bele kontinua ita nia kooperasaun ne’e atu nune’e iha futuru bele hetan rezultadu ne’ebé mak di’ak liu tan.

“Hau hakarak hateten ba sentru ida ne’e, bele sura mós ho governu liu hosi MSSI durante ne’e”, katak Ministra.

Entertantu, representante Ministru Traballu Solidariedade Seguransa Sosiál-MTSSS Portugal, Cláudia Joaquim husu atu oinsá bele servisu hamutuk, liu-liu ba sentru ne’e rasik atu nune’e bele lori ita nia oan sira ba edukasaun ida ne’ebé mak di’ak ba nasaun Timor-Leste.

Cláudia akresenta liu tan, ohin ita halo lansamentu permeira pedra nomos misaun ne’ebé sentru ne’e iha bele lori ita nia oan sira atu tuir edukasaun ne’ebé di’ak hodi aban bainrua bele dezenvolve Timor-Leste, tamba ne’e, hakarak fó mós atensaun ba kooperasaun ne’ebé iha no Portugal nafatin ho Timor-Leste atu oinsá bele ajuda tan tuir nesesidades nomós programas kooperasaun, liu-liu entre Timor-Leste no Portugal.

Iha fatin hanesan, Administradór Munisípiu Manufahi Arantes Isac Sarmento hateten, ho lansamentu ida ne’e bele ajuda Madre sira hodi bele fasilita ita nia oan sira, liu-liu labarik sira iha Suku Hola Rua. Hanesan servidór povu iha Munisípiu agradese tebes ba kolaborasaun madre sira ne’ebé mak durante ne’e ajuda ona governu iha área edukasaun hodi eduka ita nia oan sira iha Munisípiu Manufahi atu bele sai ema ne’ebé mak di’ak hodi dezenvolve ita nia nasaun Timor-Leste, katak Administradór.

Nune’e mós, Diretóra Sentru Lorosa’e, Ir. M a do Céu Marques Mateus hateten, Objetivu hosi sentru ida ne’e atu hamenus pobreza iha rejiaun ba dezenvolvimentu labarik sira, se ita hakarak rai diferente, mentalidade diferente no foun tenke hahu hosi labarik sira.

Depois sentru ne’e hamrik, ne’ebé hahu funsiona iha tinan 2015 benefisia ona labarik sira hamutuk 75 pessoas, atividades lor-loron ba labarik sira mak aprende Portugues, músika, pintura, dansa, atividade manual nsst. Durante ne’e sentru hetan apoiu hosi MSSI no la iha apoiu hosi fatin seluk, esplika Ir. M a do Céu Marques.

Partisipa iha seremónia lansamentu ida ne’e mak hanesan, Presidente Instituisaun Nasionál Seguransa Sosiál-INSS Timor-Leste, Longuinhos Armando, Diretór Jerál MSSI ba Protesaun sosiál, Eugénio João Amado de Maria Soares, Embaixadór Portugal iha Timor-Leste, Autoridades Lokais inklu komunidade iha área refere.

Comments Closed

Comments are closed. You will not be able to post a comment in this post.