INAGURASAUN UMA TURISMU KOMUNITÁRIU IHA MUNISÍPIU

Xefe Kaza Sivíl Prezidente Repúblika, Francisco Vasconcelhos, Ministru Turismu, Manuel Vong, Ministra Solidairedade Sosál, Florentina Smith, Reprezentante Sekretáriu Estadu Juventude i Desportu inklui Autoridade Lokál, hala’o inaugurasaun ba uma turismu komunitáriu ne’ebé harii hosi komunidade rasik. Seremónia refere hala’o iha Suku Babulu, Postu Administrativu Watulari, Munisípiu Viqueque, loron Kinta-Feira, (07/12/2017).

Iha biban ne’e, Xefe Kaza Sivíl Prezidente Repúblika, Francisco Vasconcelhos fó parabens no komunidade tomak ba susesu, vontade no inisiativa hodi hari’i uma turismu komunitáriu, liu-liu ba lider, lia nain no ba juventude sira. Governu ne’ebé mak susesu, Governu ne’ebé mak hamriik iha povu nia sorin no rona povu nia susar. Tanba ne’e, Xefe Kaza Sivíl sei ko’alia nafatin ho Governu atu dezenvolve ekonómia, liu-liu iha área turismu no distribuisaun ne’ebé mak justu ba povu iha Timor-Leste tomak.

Entertantu, Ministra Solidairedade Sosiál, Dra. Florentina Smith fó mós parabens ba komunidade Suku Babulu, tanba iha inisiativa rasik bele harii uma turismu komunitáriu i Governu iha responsabilidade atu akompaña besik povu nia hakarak atu lori dezenvolvimentu, liu-liu dezenvolvimentu turismu komunitáriu ida ne’e ba oin.

Nune’e mós Ministru Turismu, Manuel Vong, esplika, Ministériu Turismu ho nia knaar haat ne’ebé importante mak hanesan, hametin regulamentasaun ba dezenvolvimentu seitór turismu, buka halo protesaun ba trabalhadores lokál, involve autoridade nasionál ba turismu hodi bele asegura sustentabilidade atu dezenvolve seitór turismu, no dezenvolve no implementa polítika nasionál turismu nian ne’ebé aprova tiha ona. Liga ho uma turismu ne’ebé komunidade sira harii ona, Ministériu Turismu sei servisu hamutuk ho Ministériu relevante atu fó apoiu nafatin hodi nune’e bele kompleta infra-estrutura ne’ebé seidauk kompleta.

Iha okaziaun ne’e, Administradór Munisípiu Viqueque, Gregorio Henrique, sente urgullu tanba uma turismu komunitáriu ida ne’e realiza tanba iha inisiativa no harii hosi komunidade suku Babulu rasik. Administradór husu atu komunidade la bele para ho kondisaun ida ne’e, maibé kontinua servisu hamutuk ho autoridade lokál sira, hodi nune’e buat ruma ne’ebé sei falta bele halo kompleta.

Antes hala’o inaugurasaun, Presidente Casa Civil, Ministra Solidariedade Sosiál no Ministru Turismu ho komitiva tomak tau aifunan mós ba saudosu sira ne’ebé mate durante tempu rezisténsia ba libertasaun Timor-Leste nian iha Postu Administrativu Watulari, tanba loron 7 Dezembru hanesan loron invazaun Indonesia mai iha Timor-Leste. Liga ho restus mortais, dehan Ministra Solidariedade Sosiál, ba oin Ministériu tenke aselera konstrusaun Jardin Eróis atu nune’e restus mortais sira ne’e bele tau hamutuk iha fatin ida ne’ebé di’ak no dignu.

Ikus liu Ministra Solidairedade Sosiál ho komitiva hala’o abertura ba jogu komunitáriu iha Suku Uma Uain Leten, ne’ebé atividade ne’e organiza hosi MSS-Diresaun Nasionál Dezenvolvimentu Sosiál (DNDS), hodi bele anima komunidade sira iha suku refere. Atividade ida ne’e realiza, tanba iha kontinuasaun hosi programa diálogu no nahe biti boot ne’ebé MSS hala’o ona iha tinan kotuk hodi bele hadame fali komunidade sira ne’ebé ho situasaun konflitu iha tempu ne’ebá, nune’e kontinua hametin dame no paz iha suku refere.

Comments Closed

Comments are closed. You will not be able to post a comment in this post.