MSSI Fo Treinamento Ba Joven Nain 30 Iha Municipio Ermera

Ministériu Solidariedade Sosiál no Inkluzaun-MSSI, liu hosi Diresaun Nasionál Inkluzaun no Reinsersaun Komunitária fornese treinamentu kona-ba resolusaun konflitu ba Joven nain 30. Treinamentu refere hala’o iha Suku Matata, Postu Administrativu Railaco, Munisípiu Ermera, durante loron 3, hahu hosi loron Tersa-Feira to’o Kinta-Feira (10-12/12/2019).

Iha oportunidade ne’e, Diretóra Interina Diresaun Nasionál Inkluzaun no Reinsersaun Komunitária, Maria José Gusmão Reis hateten, Timor-Leste hanesan nasaun ne’ebé foin sai hosi konflitu, tamba ne’e Governu, liu hosi MSSI nafatin iha komitmentu atu bele fornese treinamentu ba joventude no líderes komunitárius sira hodi bele iha kapasidade atu bele rezolve no halo prevensaun ba problema sira ne’ebé akontese iha sira nia Suku no Aldeia.

Diretóra interina mós husu atu joven sira ne’ebé hetan ona oportunidade ba treinamentu refere, durante loron tolu nia laran, bele aproveita ho didiak hodi aprende buat foun ruma nune’e bele iha koñesimentu nomós kapasidade naton ne’ebé liga ba resolusaun konflitu atu oinsá bele rozolve problema ne’ebé akontese iha komunidade sira nia le’et.

Read also:
Lansamentu Permeira Pedra Ba Konstrusaun Sentru ...

Entertantu, Xefe Suku Matata, José da Conceição Trindade hateten, “treinamentu ba resolusaun konflitu ba joven sira importante teb-tebes, tamba sira bele iha koñesimentu ruma liu hosi treinamentu ida ne’e. Hau agradese ba MSSI, tamba bele fornese ona treinamentu ba jovem sira iha ami nia suku ida ne’e no treinamentu  kona-ba rezolusaun konflitu foin primeira fez akontese iha Suku Matata, hau espera katak formasaun ida ne’e iha vantajen di’ak ba joven sira atu oinsá sira bele kapasita sira nia-an hodi bele fó solusaun rasik ba konflitus ne’ebé sira hasoru nomós bele halo prevensaun ruma ba problema sira ne’ebé atu akontese”.

Xefe Suku mós husu ba MSSI atu iha futuru bele fornese tan oportunidade ba sira nia joven ne’ebé mak seidauk hetan oportunidade nomós  ba líder komunitária sira, tamba liu hosi treinamentu ne’e iha buat foun ruma ne’ebé ita bele aprende, liu-liu oinsá bele fó solusaun ba problema nomós bele halo prevensasun ba konflitu sira ne’ebé akontese iha komunidade sira nia le’et.

Read also:
Ministra MSSI Dra. Armanda Berta dos Santos Hala’o Abertura Ba Semináriu Kona-ba Esbosu Mata Dalan Implementasaun Rekollamentu No Prosesamentu Dadus

“Durante ne’e, konflitu ne’ebé akontese iha Suku matata mak hanesan problema disputa rai, violénsia doméstika, joven sira asaltu malu no baku malu, kazu hirak ne’e balun ami rezolve tuir kultara ou tradisaun ne’ebé mak ami iha, maibé kazu sira ne’ebé iha relasaun ho krime ami nafatin informa ba Polísia atu prosesa ba Ministériu Públiku hodi bele hakotu iha Tribunal”, dehan Xefe Suku Matata.

Iha fatin hanesan, Adão Jorge Batista Pinto hanesan Treinadór hateten, treinamentu resolusaun konflitu ida ne’e ninia grupu alvu mak líderes komunitárius no juventude feto no mane, ho ninia objetivu mak oinsá atu hasa’e koñesimentu no kapasidade ba joven sira no reforsa liu tan kapasidade ba líder komunitáriu sira nian hodi oinsá bele fó solusaun ba konflitu sira ne’ebé mak akontese iha sira nia Suku rasik, tamba dala barak konflitu ne’ebé akontese sira sempre hein parte externu atu halo intervensaun, liu-liu instituisaun kompetente no organizasaun atu rezolve sira nia problema, maibé ho formasaun ida ne’e bele hasa’e sira nia koñesimentu atu bele resolve rasik sira nia problema ne’ebé akontese iha suku no aldeia, liu hosi meus mediasaun no esforsu sira ba iha prosesu diálogu hodi resolve kedas problema ne’ebé mak akontese nune’e la bele fó impaktu maka’as ba komunidade sira nia moris lor-loron.

Read also:
Ministériu Solidariedade Sosiál no Inkluzaun-MSSI hamutuk ho Gabinete Primeiru Ministru ba asuntu sosiedade sívil hala’o monitorizasaun ba Instituisaun Solidariedade Sosiál-ISS iha Munisípiu Lautem

Iha tinan 2019, treinamentu ida ne’e hala’o ona iha Munisípiu 3 mak hanesan, Munisípiu Lautem, Covalima, Ermera. Depois implementasaun programa ida ne’e no bazeia ba rezultadu monitorizasaun katak fatin sira ne’ebé ita fó ona treinamentu, wainhira akontese problema ruma ne’ebé liga ho kazu sívil sira konsege resolve ona sira nia problema rasik, tamba ne’e, ba tinan oin programa ida ne’e sei kontinua nafatin ba iha Suku seluk ne’ebé mak seidauk hetan oportunidade, esplika Adão.

Comments Closed

Comments are closed. You will not be able to post a comment in this post.