MSSI, Liu Hosi BNCTL Hala’o Pagamentu Ba Benefisiárius Idosos No Invalides Hamutuk 5,387

Ministériu Solidariedade Sosiál no Inkluzaun-MSSI, liu hosi Banco Nacional Comércio de Timor-Leste (BNCTL) hala’o pagamentu ba benefisiárius Idosos no Invalides hamutuk 5,387 ba faze daruak tinan 2019 iha Munisípiu Ainaro. Atividade refere hala’o iha Loron Sexta-Feira (13/12/2019) iha Suku Mau-Ulo no Suku Ainaro Vila.

Iha okaziaun ne’e, Coordenadór Banku Back Office and Front Office Sukursal Ainaro, Bernabe de Araujo hateten, “Pagamentu Idosos no Invalides ba segunda fase ida ne’e la’o di’ak, maibe sai tarde oituan, tamba  iha failansu kona-ba liña internet ne’ebé mak la’o ladun di’ak, dadaun ne’e liña internet la’o di’ak ona no pagamentu mós la’o normal fila fali”.

Horáriu pagamentu ne’ebé mak BNCTL distribui ba Administradór Munisípiu, Administradór Postu, PNTL inklui MSSI. Ba Xefe Suku sira ne’ebé tuir lolos ne’e Administradór Postu mak sei distribui ba sira, maibe horáriu pagamentu ida ne’e la to’o ba iha sira, tamba hosi postu rasik la halo distribuisaun, husu atu iha futuru bele hadia liña koordenasaun ho di’ak nune’e antes halo pagamentu Xefe Suku sira bele iha ona koñesimentu.

Read also:
Ministériu Solidariedade Sosiál no Inkluzaun-MSSI hamutuk ho Gabinete Primeiru Ministru ba asuntu sosiedade sívil hala’o monitorizasaun ba Instituisaun Solidariedade Sosiál-ISS iha Munisípiu Lautem

Pagamentu segunda fase tinan 2019 iha Sukursal Ainaro hala’o iha Postu Administrativu 4 mak hanesan Postu Administrativu Hato-Builico, Ainaro Vila, Hato-Udo no Maubisse ne’ebé hala’o hosi Loron 09/12/2019 to’o Loron 22/01/2020 ho total benefisiárius 5,387, dehan Coordenadór Banku Back Office and Front Office Sukursal Ainaro.

Entertantu, Adozindo Almeida Mendonça hanesan Pontu Fokal ba Idosos no Invalides iha Munisípiu Ainaro hateten, dadus ne’ebé mak iha fornese hosi Xefe Suku no Xefe Aldeia sira no iha Munisípiu Ainaro rasik iha duni dadus benefisiárius ne’ebé mak pendente, maibe ladun barak no dadus hirak ne’e ami haruka fila fali ona ba iha Xefe Suku sira atu informa fali ba benefisiárius sira nune’e bele hadia hodi sira bele hetan nia direitu.

Read also:
Governu fó ona apoiu Emerjénsia ba Vítima Dezastres Naturais

Liña koordenasaun entre MSSI ho BNCTL no Líder Komunitária sira durante ne’e la’o di’ak tebes, dehan Pontu Fokal Idosos no Invalides ba Munisípiu Ainaro.

Nune’e mós Xefe Suku Mau-Ulo, Luis Valadares husu ba parte BNCTL no Ministériu Solidariedade Sosiál no Inkluzaun-MSSI atu bele halo liña koordenasaun ho líder komunitária sira nune’e pagamentu bele la’o di’ak, maibé husu ba BNCTL atu bele halo preparasaun ho di’ak ba sistema pagamentu ne’ebé mak iha antes halo pagamentu ba benefisiárius hodi labele difikulta no tarde liu, tamba benefisiáriu sira la’o do’ok no labele hein kleur liu.

Read also:
Lansamentu Permeira Pedra Ba Konstrusaun Sentru ...

Hafoin pagamentu, benefisiáriu Idoso, Alfredo de Araujo ho idade 67 anos, hosi Aldeia Hatu Lau, Suku Mau-Ulo hato’o ninia sentimentu kontente maibe tuir nia ho osan $.180 ida ne’e uza iha fulan 6 nia laran la sufisiente ba sira ninia nesesidade lor-loron nian, tamba ne’e nia husu ba Governu atu bele aumenta tan oituan nune’e sira bele uza hodi han hemu no balun uza hodi apoiu ba nia oan sira ninia eskola.

Nia mós husu ba BNCTL atu iha futuru pagamentu tenke la’o tuir horáriu ne’ebé mak iha no labele tarde nune’e sira labele hein kleur liu, tamba sira mai ho distansia ne’ebé mak do’ok.

Comments Closed

Comments are closed. You will not be able to post a comment in this post.