FETO ÁREA RURAIS HALO TAKE OVER BA MINISTRA & …

Ministériu Solidariedade Sosiál no Inkluzaun – MSSI ho Parseirus Dezenvolvimentu ba direitu Feto no Labarik selebra Loron Internasionál Labarik Feto. Relasiona ho loron ida ne’e, PLAN International realiza mós atividade ida ho naran Take Over ne’ebé lori labarik feto sira hosi área rural mai hanesan Ministra no Vise-Ministra MSSI hodi bele foti desizaun. Atividade ne’e hala’o iha Edifísiu Sentral MSSI-Kaikoli-Díli, Loron Kinta-Feira, (11/10/2018).

Objetivu hosi Atividade refere mak oinsá atu hasa’e konhesimentu, kapasidade no promove labarik feto sira atu oinsá bele lidera no bele foti desizaun.

Iha oportunidade ne’e, Ministra Solidariedade Sosiál no Inkluzaun, Armanda Berta dos Santos hateten, ohin halo enkontru ho parseirus sira ba direitu feto no labarik atu bele hala’o preparasaun ba loron internasionál ne’ebé sei realiza iha dia 20 fulan ida ne’e, ohin mós hosi PLAN International lori ita nia alin feto nain rua sai hanesan Ministra no Vise Ministra MSSI (take over-red) para bele promove ita nia alin feto sira, liu-liu iha área rural hodi fó mós oportunidade ba labarik feto sira atu partisipa oinsá atu foti desizaun. Tanba Iha ita nia konstituisaun RDTL, artigu 15 no 16 mós hateten, feto ho mane iha direitu hanesan, dehan Ministra.

Entertantu, Vise-Ministra, Signi Verdial hateten, oportunidade ida ohin ne’e atu hatudu ba públiku katak alin hirak ne’e mai hosi rural, ita mós fó oportunidade ba loron ida ohin hanesan loron importante oinsá atu lori alin feto sira ne’ebé la iha oportunidade iha área rural bele lori sira mai para bele hetan oportunidade hanesan alin feto sira ne’ebé hela iha nasionál. Dehan Vise-Ministra, alin feto nain rua ne’e mai hosi Maubesi no ida ne’e hatudu katak iha boa vontade hosi governu atu habelar informasaun liu tan no fó oportunidade liu tan ba área rural la’os deit iha nível nasionál. Tanba ne’e ohin ekipa tu’ur hamutuk para oinsá atu bele habelar liu tan rede ne’e ba munisípiu sira.

Nune’e mós feto ne’ebé Take Over sai hanesan Ministra, Joanita da Conceição Mendonça de Araújo, hato’o nia sentimentu katak, “hau kontente no apresia tebes sai nudar Ministra iha oras rua nia laran no foin primeira vez mai tu’ur iha Ministra nia fatin, atividade ida ne’e bele loke hau nia hanoin hodi hau bele hatene oinsá bele foti desizaun no ba oin hau sei fahe informasuan ne’e ba hau nia kolega sira hodi bele aumenta ami nia kapasidade”, katak Araújo.