FUNSIONÁRIUS MSSI SIMU MINISTRA, VISE-MINISTRA NO

Relasiona ho formasaun VIII Governu Konstitusional, funsionárius Ministériu Solidariedade Sosiál no Inklusaun (MSSI) hamutuk ho Ministra sesante Dra. Florentina Smith, Sekretáriu Estadu Asuntus Veteranus-SEAV sesante, Andre da Costa Belo “L4” no Prezidente Komisaun Omenajen, Virgilio Smith, simu Ministra foun, Armanda Berta dos Santos, Vise-Ministra foun, Signi Chandrawati Verdial no SEAV foun, Gil da Costa Monteiro “Oan Soru” iha edifisiu sentrál MSSI Kaikoli-Díli, Loron Segunda-Feira (25/06/2018).

Iha biban ne’e, Ministra foun akresenta, ba oin nia sei haree ba planu prioridades ne’ebé mak iha ona hodi kontinua, hanesan programa Idozus Inválidus, Bolsa da Mãe, Dezastres Naturais, Asistensia Sosiál nomós sei hadia asuntus sosiál ne’ebé mak oras ne’e dadauk hasoru hela problema barak nia laran persija tau atensaun no resolve.

Tuir Ministra MSSI foun hateten, hanesan ministra foun, nia presiza simu relatóriu ne’ebé entrega ona hosi Ministra sesante, hodi haree ba atividade tomak iha planu asaun ida ne’e no sei haree lei orgánika foun VIII Governu Konstitusionál nian karik buat balun mak sei hadia no persiza haforsa di’ak liutan papél MSSI nian.

Iha okaziaun ne’e, Ministra MSSI, Armanda Berta dos Santos no Vise-Ministra MSSI, Signi Chandrawati Verdial simu relatóriu fulan 9 hosi Ministra sesante, Dra. Florentina Smith, no Sekretáriu Estadu Asuntus Veteranus-SEAV Gil da Costa Monteiro “Oan Soru” mós simu relatóriu hosi SEAV sesante, Andre da Costa Belo “L4”.

Entertantu, Ministra sesante, Dra. Florentina Smith, iha despedida hato’o, Bem-Vindu no entrega relatoriu atividade durante mandatu no entrega patrimoniu estadu ba Ministra foun.

Ikus liu Ministra sesante hateten, husi Diretor-Jeral to’o Xefes Departamentu no funsionáriu sira servisu ho laran no fuan tanba rai ida ne’e persija los ita bo’ot sira nia kontribuisaun.

Partisipa iha Seremónia mak hanesan, Diretor-Jeral Protesaun Sosiál no Asuntus Kombatentes Libertasaun Nasionál, Eugénio João Amado de Maria Soares, Diretor-Jeral Servisus Korporativus, Rui Manuel Gago Exposto, Diretores Nasionais, Diretores Municipios, Xefes Departamentus, Asesor Nasionál no Internasional, Parseirus no Funsionárius MSSI sira.

This post is also available in: Tetum