HAND OVER PROJETUS 74 BA KOMUNIDADES
Ministra Solidariedade Sosiál no Inkluzaun, Armanda Berta dos Santos, simbolikamente entrega projetus hamutuk 74 ba iha komunidades. Projetu hirak ne’e sai hanesan pilotu ne’ebé iha relasaun ho projetu Hari’i Rezilénsia iha Komunidade sira tuir Estrada Korredór Díli-Ainaro no ba korredór sira ne’ebé ligadu, liu-liu liga ba área Risku Dezastres Naturais ne’ebé MSSI mak sai hanesan nain ba projetu no fó fiar ba PLAN International hodi implementa, seremónia Hand Over refere hala’o iha Suku Grotu, Munisípiu Manufahi no Suku Dagamesa, Munisípiu Ainaro, hahu loron Kuarta to’o Kinta Feira, (24-25/10/2018).
Projetu hirak ne’e implementa iha munisípius 4 no Sukus 25 mak henesan, Munisípiu Manufahi, Ainaro, Aileu no Ermera ho ninia Fontes Orsamentu hamutuk $. 2,7 Miliaun ne’ebé mai hosi Governu Japão, Banku Mundiál no entrega mai iha Governu Timor-Leste, liu hosi Ministériu Solidariedade Sosiál no Inkluzaun-MSSI no fó fiar ba PLAN International hodi implementa. Tipu projetu hirak ne’e mak hanesan, halo baleta, Ponte Tara, beé mo’os, rehabilitasaun Eskola, nsst. projetu ne’e hahu hosi tinan 2017, durante fulan 9 nia laran. Benefisiárius prinsipal ba projetu hirak ne’e mak komunidade ne’ebé hela iha Korredór Estrada Díli-Ainaro no Korredór ligadu sira seluk nomós benefisiárius direita hosi projetu ne’e mak 60.000 pessoas.
Iha seremónia hand over ida ne’e, Ministra Solidariedade Sosiál no Inkluzaun, Armanda Berta dos Santos hateten, Projetu ne’ebé PLAN implementa la’o di’ak teb-tebes, mesmu ho ninia durasaun tempu ne’ebé oituan maibé konsege finaliza ho kualidade i ida ne’e bele ona responde komunidade sira nia nesesidades balun, liu-liu ba sira ne’ebé hela iha área rurais sira.
Ministra hatutan liu tan, Projetu hirak ne’e relevante tebes ba komunidades sira nia nesesidades, tanba ne’e ba futuru sei nafatin servisu hamutuk ho duadores sira atu sira bele ajuda nafatin ita no kontinua liu-liu iha área risku dezastres naturais ninian.
Nune’e mós, Country Director PLAN International, Diliana Ximenes hateten, objetivu prinsipal mak atu suporta komunidade sira, liu-liu labarik sira, espesial ba labarik feto sira para bele hala’o sira nia atividades. Ba projetu ponte, baleta no estrada bele fó asesu di’ak ba komunidade sira, wainhira iha dezastres ruma atu sira bele uza lalais hodi ba fatin seguru, bele fó asesu ba edukasaun, saúde no bele lori sira nia produtu ba merkadu.
Ohin mós ita inaugura ba rehabilitasaun eskola ne’ebé sobu hosi anin bo’ot no labarik sira la bele uza eskola ida ne’ebé próprio, tanba ne’e mak ita hadia hodi nune’e sira bele iha kondisaun di’ak hodi bele halo aprendisazen, aleinde ne’e mós fornese beé ba komunidade sira ne’ebé persiza tanba beé importante ba ita nia moris, halo mós sintina, drinagen, ponte tara, para labarik sira bele uza hodi ba eskola wainhira tempu udan. Aleinde projetu físiku iha mós projetu non físiku hanesan treinamentu kona-ba primeiru sokoru, redusaun risku dezastres, uma metin, sistema alarma sedu, nsst.
PLAN International sei esforsu maka’as atu nafatin servisu hamutuk ho banku mundiál liu hosi MSSI ou Ministériu sira seluk para atu bele kontinua tanba PLAN implementa projetu hirak ne’e hodi hakbesik ba komunidade no sira mak sai hanesan nain ba projetu hirak ne’e, dehan Diliana.
Entertantu, Xefe Aldeia III, iha Suku Grotu, Domingos Pereira Magno hateten, “durante PLAN hala’o servisu iha ne’e, ami sente di’ak no kapa’as tebes, liu-liu ba projetu beé, estrada no baleta i ami agradese tebes ba Governu no PLAN International, tanba projetu hirak ne’e bele fó ona benefísiu ba ami komunidade sira ne’ebé hela iha área rurais, maibé ami mós husu nafatin atu projetu hirak ne’e bele kontinua nafatin ba fatin sira ne’ebé ami ninia komunidade balun seidauk asesu, liu-liu ba fatin sira ne’ebé iha posibilidade risku dezastre naturais wainhira iha tempu udan”.
Partisipa iha seremónia hand over ne’e mak hanesan, Sekretário Estado Protesaun Sivil, Alexandrino Xavier de Araujo, Diretór Jerál Servisu Corporativu MSSI, Rui Manuel Gago Exposto, Diretór Nasionál Dezenvolvimentu Sosiál, Florencio Pina Dias Gonzaga, Administradór Munisípius, Representantes Liñas Ministeriais, Autoridades Lokais inklui Komunidades.
