INSTITUISAUN SÃO JOÃO DE DEUS LACLUBAR HETAN VIZITA

Ministra Solidariedade Sosiál no Inkluzaun, Armanda Berta dos Santos no Vise-Ministra, Signi Verdial hala’o vizita ba Instituisaun São João De Deus Laclubar. Objetivu hosi vizita ne’e mak oinsá bele haree direitamente situasaun no kondisaun pasiente sira nian ne’ebé hala’o tratamentu iha Postu Administrativu Laclubar, Munisípiu Manatuto, loron Kinta-Feira, (20/09/2018).

Hafoin vizita, Ministra Solidariedade Sosiál no Inkluzaun, Armanda Berta dos Santos esplika, ohin mai vizita fatin ba tratamentu ema moras nian ne’ebé mai hosi 12 Munisípiu inklui RAEO hodi bele haree direitamente kondisoins pasiente sira nian no bele hatene difikuldades ne’ebé instituisaun ida ne’e infrenta.

Hosi difikuldades ne’ebé mak iha, ba futuru MSSI sei haree atu bele fó apoiu nafatin ba instituisaun ida ne’e hodi bele halo atendimentu ida ne’ebé di’ak liu tan ba ita nia pasiente sira ho dignu.

Akompaña Ministra no Vise-Ministra MSSI iha vizita refere mak hanesan, Diretór Nasionál Dezenvolvimentu Sosiál, Florençio Pina Dias Gonzaga, Diretór Nasionál Assisténsia Sosiál, Mateus da Silva.