KOMISAUN ORGANIZADORA BA 2a DESMOBILIZASAUN HASORU

Vise Ministru Ministériu Solidariedade Sosiál (MSS), hanesan mos Vice-Presidente Komisaun Organizadora 2 a Desmobilizasaun Falintil, Dr. Jacinto Rigoberto Gomes de Deus, halo sorumutu ho Presidente Repúblika, Senhor Taur Matan Ruak ho Ministériu relevantes, hodi informa kona-ba preparasaun ba Serimónia K omemorasaun Loron FALINTIL 20 Agostu 2013 no Segunda Desmobilizasaun ba Kombatentes Frente Armada Resistência Timorense ne’ebé hamutuk ema na’in 221. Reuniaun refere hala’o iha Salaun Edifísiu Prezidente RDTL, Aitarak Laran-Dili, iha loron Kuarta-feira,(01/08/2013).

Hafoin informa ba Presidente Repúblika, Vise Ministru MSS ne’e hato’o, Desmobilizasaun ne’ebé maka atu halao, ne’e ba dala rua, ne’ebé hamutuk ema na’in 219, maibé konta mós ho na’in 2 ne’ebé mak naran iha primeira desmobilizasaun naran tama tiha ona maibé sira la konsege partisipa no sira sei partisipa hotu ho total ema 221. Ba sira ne’e dehan Vise, sei entrega Sertifikadu Desmobilizasaun, Medalla Onra ne’ebé atu fó hanesan atribuisaun. Hosi parte MSS, orsamentu ne’ebé prevé pur volta quinentus mil dollares amerikanos ($.500,000) no mós ba kada liñas Ministeriais ida-idak aloka ninia orsamentu.

Ho objetivus ida ne’e mak, Komisaun Organizadora ne’ebé kompostu hosi Ministériu relevantes hanesan Ministériu Solidariedade Sosiál, Ministériu Defeza no Seguransa, Ministériu Obras Públika liu hosi Sekretáriu Estadu Eletrisidade nian, hamutuk hodi informa progresu preparativus ba serimónia refere ba Sua Exelénsia. Presidente Repúblika no mós atu husu mós Sua Excia. nia orientasaun ruma relasiona ho preparasaun ne’e.

“Tempu mós badak dadauk ona, Komisaun Organizadora agora hala’o servisu maka’as hela hosi seksaun ida-idak ninian. Komisaun Organizadora sei hala’o tan enkontru ba dala ikus iha dia 7 Agostu 2013 iha Salaun MSS, hodi halo avaliasaun finál kona-ba preparativus ne’ebé mak Komisaun Organizadora ho ninian kada seksaun ne’ebé iha.

Dr. Jacinto hatutan, serimónia ne’e hotu-hotu hatene hanesan loron Falintil ninian, ne’ebé mak sei hasa’e Bandeira Nasional iha dia 20 de Agostu 2013, maibé hahú iha loron 19 Agostu, hotu-hotu iha ne’eba ona atu tuku 4 loraik sei hola parte iha misa boot ida, ne’ebé maka sei prezidi rasik hosi Amo Bispo Dom Alberto Ricardo. Hafoin tama iha 20 Agostu, serimónia hasa’e bandeira no hatun bandeira iha lorokrai, no iha kalan halo inaugurasaun ba sentrál elétrika.

Vise realsa liu tan, hosi orientasaun ne’e, Sua Exelénsia Prezidente Repúblika fó apresu ba Komisaun Organizadora nia servisu, husu para bele halo preparasaun ne’ebé mak di’ak iha loron ne’ebá no em-prinsipiu, laiha kestaun ida ne’ebé mak sai preokupadu hosi Komisaun rasik no mós Sua Exelénsia Presidente Repúblika. “Maibé nu’udar Komisaun Organizadora, tenta nafatin para atu koordena ba malu entre ministeriál hodi nune’e preparasaun ne’e bele la’o di’ak,” dehan Vise Ministru.

Enkontru ne’e partisipa mós, Vise Ministru Ensino Sekundáriu, Virgilio Smith, Sekretáriu Estadu Asuntus Kombatentes Libertasaun Nasionál, Júlio Sarmento da Costa, Sekretáriu Estadu Eletrisidade, Januário da Costa Pereira.

This post is also available in: Tetum