KONSULTASAUN POLÍTIKA JESTAUN RISKU DEZASTRE

Ministra Solidariedade Sosiál no Inkluzaun, Armanda Berta dos Santos, no Vise-Ministra Signi Verdial hamutuk ho Sekretáriu Estado Protesaun Sivil, Alexandrino Xavier de Araújo, Country Director-UNDP, Claudio Propinas, Directór Jerál, servisu ba asisténsia sosiál no asuntus veteranus, Eugénio J. A. de M. Soares, Parseirus Nasionais no Internasionais hala’o revisaun ba polítika nasionál jestaun risku dezastres iha Timor-Leste, nune’e mós entrega ofisialmente ekipamentus kona-ba sistema alerta sedu (EWS) hosi UNDP ba Ministériu Solidariedade Sosiál no Inkluzaun-MSSI ne’ebé lansa ona horseik iha Ministério dos Transporte e Comunicações-MTC. Atividade ne’e hala’o iha Edifísiu Sentral MSS-Kaikoli-Díli, Loron Terça-Feira, (14/08/2018).

Iha okaziaun ne’e, Ministra Solidariedade Sosiál no Inkluzaun, Armanda Berta do Santos hateten, Objetivu hosi workshop nasionál ida ne’e atu halo konsultasaun hodi hetan ideia no sujestaun hosi parte interesadu sira, nune’e bele kontribui prosesu revisaun ba pólitika dezastre naturais.

Timor leste lokaliza iha área risku ba dezastre bai loron naruk, anin boot, rai nakdoko, inundasaun (be’e sae), ahi han rai no rai monu ne’ebé fó ameasa ba populasaun nia moris tanba ne’e governu Timor leste formula no adopta pólitika nasionál ida ba jestaun risku dezastre iha 2008 no utiliza hanesan instrumentu legal ida ba mitiga ,redus, prevene nomós responde emerjénsia, rekoperasaun no reabilitasaun, maibe pólitika ida ne’e presija reve hodi bele hapar ho tipu risku dezastre iha rai laran, liu-liu dezastre ne’ebé hamosu hosi “perigu mai neneik maibe bebeik”.

Razaun seluk ba ita hodi reve ita nia pólitika ba jestaun dezastre ne’e mak ita nia pólitika tuan barak liu foka ba asaun responde emerjénsia, maibe la dun foka ba iha asaun mitigasaun,redusaun risku molok dezastre mosu nomós ita nia pólitika tuan ladun kobre investimentu ba dezastre hosi seitor oin-oin, adisionalmente, pólitika ba jestaun risku dezastre mos presija ho akordu internasional ba risku dezastre ninian hanesan kuadru sendai ba redusaun risku dezastre ne’ebé mak adopta iha 2015 no sei termina iha 2030 no Timor-leste adere ona ba kuadru sendai ida ne’e.

Ho razaun balun iha leten,mak ita presija duni hodi halo revizaun ba ita ninia pólitika nasional ba jestaun dezastre hodi bele hatan ba kondisaun tipu dezastre hotu-hotu no hatan ba implementasaun hosi rekezitus Kuadro sendai ninian. Ho nune’e, projetu Dezemvolvimentu Estrada koridor Dili-Ainaro ne’ebe jere hosi UNDP no ezekuta hosi MSSI bele fó asistênsia finanseiru hodi halo revizaun ba póitika nasionál ba jestaun risku dezastre iha rai laran, dehan Ministra.

Ikus liu, ministra hato’o, ho esperiensia, matenek no konhesimentu iha workshop ida ne’e sei bele kontribui di’ak liu tan ba revizaun pólitika ne’ebé ninia esbosu prepara tiha ona hosi konsultór nasionál no ho konsultasaun loron ohin, bele formula pólitika ida ne’ebe integradu, inkluzivu, kompelementariu no evita duplikasaun servisu ba redusaun risku dezastre iha rai laran.

Entertantu, Sekretáriu Estado Protesaun Sivil, Alexandrino Xavier de Araújo hateten, desastre naturais ne’e hanesan programa ida ne’ebé hahu hodi atende komunidade sira nia nesesidade (vítima-red) no iha atensaun hosi governu desde 2008 até VIII governu ne’ebé iha koperasaun ho parseiru agénsia internasionais sira.

Atu identifika fatin risku sira ne’ebé mak iha Timor laran tomak, hodi bele iha mós planu ida para oinsá ita bele ko’alia kona-ba prevensaun, mitigasaun no redus bainhira iha situasaun desastre naturais akontese. Agora dadaun, iha Sekretáriu Estadu Protesaun Sivil iha ekipa ida ne’ebé hala’o tiha ona servisu kona-ba base dadus, hodi bele identifika fatin risku iha Timor laran tomak.

Projeitu koridor estrada Díli-Ainaro ne’ebé ita servisu hamutuk ho agénsia UNDP no IOM nomós agénsia sira seluk, ida ne’e hanesan etapa primeiru no etapa tuir fali mai koridor hosi Díli-Baucau, Viqueque-Lospalos no koridor Maliana to’o iha Oe-cusse ne’ebé ho faseadamente sei hala’o, esplika Alexandrino.

Workshop ida ne’e realiza tanba iha koordenasaun no servisu hamutuk ne’ebe di’ak entre MSSI ho sekretáriu Estadu de seguransa no protesaun sivil inklui UNDP.